२८ चैत, काठमाडौं । शनिबार कीर्तिपुरमा आयोजित ६३ ओभरको खेल दिवगंत अष्ट्रेलियन ब्याट्सम्यान फिलिप हृयूज सच्चा श्रद्धान्जली भएको छ ।
झण्डै १५ हजार दर्शकको सहभागिता, रायन कार्टरको टीमको १६३ रनको स्कोर र रोमाच्चक भिन्डन्तले यो खेल हृयूजप्रति श्रद्धान्जलीमा कोशेढुंगा सावित भएको छ ।
क्रिकेट अष्ट्रेलियाका अध्यक्ष वली एडवड्र्स स्वयंम खेल हेर्न मैदानमा उपस्थित थिए । अष्ट्रेलियन क्रिकेटर रायन कार्टरले नेपाल टीम रेडको कप्तानी गरेका थिए भने टीम ब्लुको कप्तान विनोद दासले गरे । पूर्व कप्तान विनोदले यही खेलबाट १७ वर्षे लामो क्रिकेट करियर अन्त्य गरे ।
पहिले ब्याटिङ गरेको टीम रेडले ३३.१ ओभरमा ९ विकेट गुमाएर १६३ रन बनायो । संयोग नै मान्नुपर्छ, ६३ रनमा अविजित रहँदा निधन भएका हृयूजप्रति श्रद्धान्जली दिन आयोजित खेलमा १६३ स्कोर बन्यो ।
उसका लागि शरद भेसवाकरले ५३ बलमा ५२ रनको महत्वपूर्ण पारी खेले । उनले आफ्नो अर्धशतक हृयूजप्रति समर्पित गरेका छन् ।
जवाफमा टीम ब्लूले ३३.३ ओभरमा ८ विकेट गुमाएर १६२ रन मात्र बनाउन सक्यो । महेश क्षेत्रीको ५८ र विनोद दासले ४१ रन बनाएपछि टीम ब्लु जिततर्फ उन्मुख भएको थियो । तर, ३१ औं ओभरमा अष्ट्रेलियाका म्याथु इलियटले तीन विकेट लिएपछि खेलले नाटकीय रुप लियो ।
तर, अन्तिम ३ बलमा टीम ब्लुलाई जितका लागि ५ रन चाहिएको थियो । पहिलो र दोस्रो बलमा १-१ रन बनाएपछि अन्तिम बलमा तीन रन चाहियो ।
क्रिजमा विनोद भण्डारी थिए भने बलिङमा आरिफ शेख । आरिफको बलमा विनोदले एक रन लिएर अर्कोका लागि दौडने क्रममा रन आउट भए र कार्टर नेतृत्वको टीम रेडले १ रनको रोमान्चक जित हात पार्यो ।
म्याथु म्यान अफ दि म्याच बने । कार्यक्रममा सर्वोच्च शिखर सगरमाथामा लैजान हृयूजको वन डे र टेष्ट जर्सीका साथै ब्याट हस्तान्तरण गरिएको छ ।