सन् २०१४ यता पहिलोपटक उच्च दरमा गिरावट हुने क्रममा एप्पल कम्पनीको शेयर बिहिबार ९० डलर भन्दा तल झरेको छ । यो वर्षको अन्त्यतिर एप्पलले आफ्नो नयाँ आइफोन लन्च गर्ने अपेक्षा गरिएको छ र त्यसअघि एप्पलका प्रडक्टको मागमा आएको कमीले वालस्टि्रटमा चिन्ता पैदा गरिदिएको छ ।
गत बिहिबार एप्पलको शेयर मूल्यमा २.३५ को गिरावट हुँदै ८९.४७ डलरमा झरेको छ ।
विश्व बजारमा एप्पलका प्रडक्टको मागमा आएको कमीका कारण एप्पलका ग्याजेटका पाटपुर्जा सप्लाइ गर्ने ताइवानी कम्पनीहरुले यो वर्षको दोश्रो त्रैमासिकमा गत वर्षको भन्दा कम अर्डर प्राप्त गर्ने देखिएको छ । एप्पलले गत सेप्टेम्बरमा मात्रै आफ्नो उच्च मूल्यका फोन लन्च गरेको थियो र यति छिटै ती प्रडक्टको मागमा आएको गिरावटले एप्ललका लगानीकर्तालाई चिन्तित तुल्याएको छ ।
उत्पादन अनुमान तथा पाटपुर्जा अर्डरमा आउने कमीका कारण मानिसहरुमा एप्पलप्रतिको धारणा उत्साहजनक नबनेको र एप्पलको नयाँ आउने भनिएको आइफोनका फिचर्स समेत विद्यमान आइफोन सिक्स एस भन्दा फरक नदेखिएको रोसेनब्लाट सेक्योरिटिजका विश्लेषक जन झांगले बताएका छन् ।
शेयर मूल्यमा गिरावटसँगै एप्पलले विश्वको सबैभन्दा धेरै बजार पुँजी भएको कम्पनीको ताज पनि गुगलको मातृ कम्पनी अल्फाबेटलाई सम्पनु परेको छ ।
गत अपि्रलमा पछिल्लो १३ वर्षमा पहिलोपटक कम्पनीको राजश्वमा गिरावट तथा आइफोनको बिक्रिमा गिरावट आएको पहिलो त्रैमासिक तथ्यांक सार्वजनिक भएसँगै एप्पल कम्पनीको आत्मविश्वास डगमगाएको हो । अब एप्पलको आगामी आइफोनको माग पनि उतिसारो नहुने चिन्ता रहेको छ ।
पछिल्लो समय चिनिया बजारमा एप्पलको आम्दानीमा तिव्र गिरावट देखिएको छ । सन् २०१६ को पहिलो त्रैमासिकमा चीनमा एप्पलको आम्दानी २६ प्रतिशतले घटेको छ । चिनिया बजारमा एप्पलले शाओमी तथा हुवावे जस्ता सस्तो मूल्यका स्मार्टफोनसँग चर्को प्रतिस्पर्धा बेहोर्नु परेको छ ।
एप्पलको भविष्य संकटमै परेको हो त ? यस विषयमा विश्लेषकहरु पनि चिन्तनमा छन् । उनीहरुका अनुसार स्मार्टफोन अझ विशेषगरी आइफोनको बजार संतृप्त अर्थात् पूर्ण भैसकेको छ र एप्पलले आइफोन भन्दा अन्य क्षेत्रमा खासै उत्साहजनक काम गर्न सकेको छैन । त्यसैले अन्य प्रडक्टमा समेत व्यापक वृद्धिका यत्नहरु गरेमात्र एप्पलको भविष्य बँच्नेछ । रोयटर्स