२६ भदौ, काठमाडौं । सुनसरीको धरानमा मुख्य कार्यालय रहेको क्षेत्रीयस्तरको मितेरी डेभलपमेन्ट बैंकले सेयरधनीलाई ३१.५८ प्रतिशत लाभांस दिने घोषणा गरेको छ ।
बैंकको आइतबार बिहान बसेको सञ्चालक समितिको बैठकले गत आर्थिक वर्षको नाफाबाट ३० प्रतिशत बोनस सेयर र त्यसको कर प्रयोजनका लागि १.५८ प्रतिशत नगद लाभांस दिने घोषणा गरेको हो । गत वर्ष बैंकले ९ करोड ७२ लाख रुपैयाँ खुद नाफा कमाएको थियो ।
बोनस सेयर वितरण गरेपछि बैंकको चुक्ता पुँजी २७ करोड रुपैयाँ पुग्नेछ । हाल बैंकको चुक्ता पुँजी २१ करोड रुपैयाँ छ ।
बैंकले गरेको लाभांसको घोषणा नियामक नेपाल राष्ट्र बैंकले स्वीकृति दिएपछि र सम्बन्धित बैंककै आगामी साधारणसभाले पारित गरेपछि मात्रै वितरण गरिनेछ ।
