५ असोज, काठमाडौं । भारतका लागि प्रस्तावित राजदूत दीपकुमार उपाध्यायविरुद्ध संसदीय सुनुवाई विशेष समितिमा तीन उजुरी परेको छ ।
सुनुवाई समितिको बुधबार बसेको बैठकले उजुरीहरु अध्ययनका लागि सदस्यहरुलाई वितरण गरिएको छ । उजुरीकर्ता मध्ये एक आगामी १२ गते समितिमा उपस्थित हुन समेत तयार भएका छन् ।
उपाध्याय भारतका लागि पूर्वराजदूत समेत हुन् । सरकार ढाल्न सक्रिय भएको लगायतका आरोप लगाएर केपी शर्मा ओली नेतृत्वको अघिल्लो सरकारले उनलाई फिर्ता बोलाएको थियो ।
तर, कांग्रेसको समर्थनमा बनेको प्रचण्ड नेतृत्वको नयाँ सरकारले पूर्वमन्त्री समेत रहेका उपाध्यायलाई फेरि भारतकै लागि राजदूतमा सिफारिस गरेको छ । जसको एमालेले विरोध गर्दै आएको छ ।
समितिमा चीनका लागि प्रस्तावित राजदूत लीलामणि पौडेलविरुद्ध भने लिखित उजुरी परेको छैन । पौडेल पूर्वमुख्य सचिव हुन् ।
सुनुवाई समितिका एक सदस्यका अनुसार दुबै प्रस्तावित राजदूतसँग १२ गते सुनुवाइ गर्ने तयारी भइरहेको छ ।
सिटौलाविरुद्ध उजुुरी आहृवान
संसदीय सुनुवाई विशेष समितिले न्यायपरिषद सदस्यका लागि प्रस्तावित रामप्रसाद सिटौलाविरुद्ध उजुरी आह्वान गर्ने निर्णय गरेको छ । उजुरीका लागि १० दिनको समय दिइनेछ ।
