दुनियाँमा हर कोहीले मजाको अभिनय गर्छन्
कसैले मामा कसैले काकाको अभिनय गर्छन् ।
हिजो आज यसरी’नि जम्ने गर्छन् मेहफिलहरू,
कसैले सुनेको कसैले सुना’को अभिनय गर्छन् ।
स्टेयरिङ अर्कैको हातमा छ मनपरी घुमाइरहन्छ,
ड्राइभर-सिटमा बस्नेले चैं चला’को अभिनय गर्छन्
निदाएका भए बरू उठाउन सजिलो हुन्थ्यो ,
कसो गरौं यारहरू निदा’को अभिनय गर्छन् ।
जसले तानिरहन्छन् खुट्टा च्याप्प समातेर,
काँधमा राखेर माथि चढा’को अभिनय गर्छन् ।
आज फेरि हाम्रो घरमा सबलाई पुग्ने अन्न छैन,
आज पनि बाबा आमा अघा’को अभिनय गर्छन् ।