२८ फागुन, काठमाडौं । नेपाली कांग्रेसका सभापति शेरबहादुर देउवाले सबै दललाई सहमतिमा ल्याएर तोकिएकै मितिमा निर्वाचन सम्पन्न हुने बताएका छन् ।
बुढानिलकण्ठस्थित निवासमा चिनियाँ कम्युनिष्ट पार्टी अन्तर्राष्ट्रिय विभागका महानिर्देशक नेतृत्वको प्रतिनिधिमण्डलसँग शनिबार भएको भेटमा देउवाले मधेसी मोर्चालाई समेत सहमतिमा ल्याएर निर्वाचन गराइने बताए ।
सभापति देउवा र चिनियाँ प्रतिनिधिमण्डलबीच करीब ४५ मिनेटसम्म छलफल भएको थियो । नेपालको वर्तमान समसामयिक राजनीतिक अवस्था तथा नेपाल-चीन बीचको आपसी सम्बन्ध र सहयोगका विषयमा भेट केन्दि्रत रहेको कांग्रेस केन्द्रीय कार्यालयका मुख्य सचिव कृष्णप्रसाद पौडेलले जानकारी दिए ।
भेटमा सभापति देउवाले नेपाल एक चीन नीतिप्रति कटिवद्ध रहेको र यसमा शंका गर्नुपर्ने कुनै आवश्यकता नरहेको बताएका थिए ।
भेटवार्तामा चिनियाँ प्रतिनिधिमण्डलले सभापति देउवालाई चीन भ्रमणको निमन्त्रणासमेत दिएको थियो ।