१० बैशाख, ओखलढुंगा ।स्थानीय तहको निर्वाचनमा उम्मेदवार बन्न जिल्लाका शिक्षकहरुले धमाधम राजीनामा दिन थालेका छन् । १० जना शिक्षकले जिल्ला शिक्षा कार्यालयमा राजीनामा बुझाइसकेका छन् ।
राजीनामा दिनेहरुमा एमाले निकट शिक्षक संगठनका अध्यक्ष विशाल पौडेल र सदस्य हरि घिमिरे छन् । पौडेलले वडाध्यक्ष र घिमिरेले चम्पादेवी गाउँपालिकाको अध्यक्षको टिकट पाउने भएपछि राजीनामा दिएका हुन् । पार्टीको आग्रहमा आफूले राजीनामा दिएको पौडेलले बताए ।
त्यस्तै स्थानीय चुनाव लड्न शिक्षक संघका तीर्थ घिमिरले राजीनामा दिएका छन् । उनी सिद्धिचरण नपाको १ नं वडामा अध्यक्ष लड्दैछन् ।
माम्खाका लोकबहादुर राई, मूलखर्कमा मोहन तामाङ, बलखुमा केशव लुइटेलले राजीनामा दिएका छन् । माओवादी केन्द्र निकटका देवराज श्रेष्ठ र धनश्याम दाहालले पनि राजीनामा दिएका छन् । पार्टीलेे वडा अध्यक्षको उम्मेदवार बनाउने भएपछि राजीनामा गरेर चुनाव प्रचारमा लागेका छन् ।
जागिरे नेताविरुद्ध विद्रोह !
त्यस्तै शिक्षक संघका वेदबहादुर रोक्काले खिजीदेम्वा गाउँपालिका प्रमुखको टिकट पाउने भएपछि राजीनामा दिने तयारी गरेका छन् । राजीनामा दिने शिक्षकहरुमा कांग्रेस निकटका धेरै छन् ।
पार्टीमा क्रियाशिल कार्यकर्ताहरुले भने जागिरेहरुलाई टिकट दिन नहुनेमा पार्टी नेतृत्वलाई दबाव दिइरहेका छन् ।
उर्जावान् समय पार्टीमा लगानी गरेकालाई पन्छाएर जागिरेहरुलाई टिकट दिए विद्रोह हुने खिजीदेम्वा गाउँ पालिकाका एक काँग्रेस नेताले बताए । उनले कांग्रेसमा सयौं योग्य नेताहरु भए पनि जागिरेलाई टिकट दिए सक्रिय कार्यकर्ताहरुले विद्रोह गर्ने बताए ।
जिल्ला शिक्षा कार्यालयले राजीनामा धमाधम आए पनि प्रयोजन भने नखुलेको जनाएको छ ।
