२९ बैशाख, काठमाडौं । संघीय गठवन्धनका अध्यक्षबाट उपेन्द्र यादवलाई हटाएपछि राष्ट्रिय जनता पार्टी नेपाल र संघीय समाजवादी फोरमबीच आरोप प्रत्यारोप चलिरहेको छ ।
यसमा दुबै दलका शीर्ष नेताहरु पनि सहभागी छन् । फोरमका अध्यक्ष उपेन्द्र यादवले पनि यो जुहारीमा सहभागी भएका छन् । संघीय गठबन्धनबाट आफूलाई हटाएको भनेर प्रचार गरिएको भन्दै उनले यो घृणित कार्य भएको बताए ।
‘महन्थ ठाकुरजीले आफू अध्यक्ष भएको भनेर आँफै मनगणन्ते वक्तव्य जारी गर्नुभएछ’ शुक्रबार एक कार्यक्रममा यादवले भने, ‘मलाई भनेको भए त म आँफै उहाँलाई सम्मानजनक रुपमा फूलमाला र अविर लगाएर पद दिन्थें नि ।’
राजपाका नेता राजेन्द्र महतोप्रति लक्षित गर्दै यादवले विगतमा गठबन्धनविरुद्ध उफ्रनेहरु नै आज यस्तो घृणित काम गरेको आरोप लगाए । उनले भने, ‘एक दुई जना मान्छे बोलाएर आफूले आफैंलाई गठबन्धनको संयोजक तोक्नु लाजमर्दो कुरा हो ।’
