११ भदौ, काठमाडौं । हुण्डाईले आफ्नो लोकप्रिय ह्याचब्याक स्यान्ट्रोलाई फेरि बजारमा ल्याउने भएको छ । तर, स्यान्ट्रो अब विल्कुलै नयाँ डिजाइन र फिचर्ससहित उपलब्ध हुनेछ ।
२०१४ बाट उत्पादन बन्द भएको स्यान्ट्रो ४ वर्षपछि सन् २०१८मा नयाँ अवतारमा बजारमा उतार्ने तयारी हुण्डाईले गरिरहेको छ । पहिलो उत्पादनको २० वर्षपछि फेरि स्यान्ट्रो ‘नयाँ जीवन’ लिएर आउनेछ ।
कम्पनीले स्यान्ट्रोलाई १.१ लिटर आईआरडीई र १.२ लिटर कप्पा इञ्जिनको अप्सन दिन सक्ने बताइएको छ । यसले करिब ७० पीएसको पावर दिनेछ । यो केवल पेट्रोल इन्जिनमा मात्र उपलब्ध हुने अनुमान छ ।
यसमा ५ स्पीड म्यानुअल गियर राख्न सक्ने अनुमान गरिएको छ । बजारमा हल्ला यो पनि छ की यसमा अटोमेटिक गियरबक्स पनि हुनेछ, जुन सानाकारमा पहिलोपटक रहनेछ ।
झण्डै २० लाख कार बेचेर स्यान्ट्रो अझै पनि धेेरै बिक्ने कारको सूचीमा सामेल छ ।
कम्पनीले स्यान्ट्रो कारलाई सन् १९९८ मा पहिलोपटक बजारमा ल्याएको थियो । हुण्डाई इण्डियाका म्यानेजिङ डाइरेक्टर र सिईओ वाय के कूले सन् २०१८को अन्त्यसम्म स्यान्ट्रो भारतीय बजारमा आइसक्ने बताएका छन् ।
कारको डिटेल अझै पनि बाहिर आएको छैन । तर, अब आउने स्यान्ट्रो पुरानो भन्दा उत्कृष्ट स्वरुपमा आउनेछ । यसमा इन्टेरियर स्पेशदेखि डिजाइन सबै निकै उत्कृष्ट रुपमा ल्याइने मानिएको छ ।
यसलाई हाइटेक फिचर्स लोड गरेर प्रिमियम ह्याचब्याक जस्तो बनाएर प्रस्तुत गर्ने योजनामा कम्पनी रहेको दावी अन्तर्राष्ट्रिय सञ्चारमाध्यमले जनाएका छन् ।
कम्पनीले स्यान्ट्रोको उत्पादन बन्द गरेपछि बजारमा ग्राण्ड आई-टेनलाई प्रवर्द्धन गरेको थियो । सँगै इन्ट्री लेभलको इओन ह्याचब्याक कारले पनि हुण्डाईको ब्राण्डलाई नयाँ उचाई दिएको थियो ।
कम्पनीले नयाँ स्यान्ट्रोको विकास गर्न झण्डै १ हजार करोड भारु खर्च गरेको अनुमान छ । अहिले बजारका इन्ट्री लेभलका टक्कर दिने गरी स्यान्ट्रोले रि-इन्ट्री मार्नेछ ।
यो कारलाई पूर्ण रुपमा नयाँ प्लेटर्फममा तयार गरिने अनुमान छ ।
नयाँ स्यान्ट्रो पहिलेको भन्दा पनि धेरै प्रिमियम अवतारमा साथ उपस्थित हुनेछ । पहिले इन्ट्री लेभलको मानिएको कार अब निकै परिस्कृत भएर आउनेछ ।
नयाँ स्यान्ट्रोमा पावर विन्डो, एसी, हाइट एड्जस्टेबल सिट लगायत थुप्रै सुविधा हुनेछ । सुरक्षाका लागि एयरब्याग तथा एबीएस पनि उपलब्ध हुने चर्चा छ । यसमा नो टलब्वाई डिजाइन प्रयोग गरिनेछ, अर्थात यो ठूलो उचाइको हुने छैन ।
