४ असोज, कपिलवस्तु । कपिलवस्तु जिल्लामा गोली हानी हत्या गरेर फरार भएका भारतीय एक अभियुक्तलाई कपिलवस्तु प्रहरीले पक्राउ गरेको छ ।
पक्राउ पर्नेमा भारत बढनीका २५ वर्षीय अल्ताफ हुसेन उर्फ पिन्टु रहेको जिल्ला प्रहरी कार्यालय कपिलवस्तु प्रहरी नायव उपरीक्षक (डिएसपी) एवं प्रवक्ता प्रहृलाद अधिकारीले अनलाइनखबरलाई जानकारी दिए ।
पक्राउ परेका हुसेनले ३ वर्ष अघि जिल्लाको कृष्णनगर नगरपालिका २ कृष्णनगरका कौशल अलीलाई गोली हानी हत्या गरी फरार भएका थिए ।
फरार रहेका हुसेनलाई मंगलबार राति मृतकका भाइलगायत स्थानीयले बजारमा देखेर पक्राउ गरेर प्रहरीलाई बुझाउने ल्याउने क्रममा हुसेन पुनः फरार भएपछि प्रहरीले तत्काल हुसेनलाई पक्राउ गरेको डिएसपी अधिकारीले बताए ।
पक्राउ गर्ने क्रममा स्थानीयले हातपात गर्दा हुसेनलाई सामान्य चोटपटक लागेको र शिवराज अस्पताल बहादुरगञ्जमा उपचार गराएर उनलाई थुनामा राखिएको अधिकारीले जानकारी दिए ।
उनका अनुसार घटनाको मिसिल तयार गरेर उनलाई जिल्ला अदालत कपिलवस्तुमा पेस गर्ने तयारी भइरहेको छ ।
