७ माघ, काठमाडौं । राजधानीबाट आइतबार प्रकाशित भएका राष्ट्रिय दैनिक पत्रिकाहरुको प्राथमिकतामा अलग–अलग विषयहरु परेका छन् । पत्रपत्रिकाहरुले आज आर्थिक, सामाजिक, राजनीतिकदेखि पर्यावरणसम्मका विषयलाई आफ्ना पृष्ठहरुमा समेटेका छन् ।
सातै प्रदेशका प्रदेशसभामा निर्वाचित सदस्यले आइतबार अस्थायी मुकाममा पद तथा गोपनीयताको शपथ लिन लागेको समाचारलाई आजका सबैजसो दैनिक पत्रिकाहरुले विभिन्न शीर्षक दिएर लेखेका छन् ।
एमाले–माओवादी एकताका लागि पछिल्ला दिनहरुमा ती पार्टीका शीर्ष नेताहरुले सक्रियता बढाएका छन् । यो विषयलाई पनि आजका पत्रिकाहरुले महत्त्वका साथ छापेका छन् ।
कांग्रेस संसदीय दलको चुनाव हुन लागेको र पार्टी सभापति शेरबहादुर देउवासँग प्रकाशमान सिंह भिड्न लागेकोलाई नयाँ पत्रिका दैनिकले मुख्य समाचार बनाएर छापेको छ । कालिकोटमा फैलिएको भाइरल प्रकोपलाई मुख्य समाचार बनाएको कान्तिपुरले स्मार्ट लालपुर्जा ल्याउने गृहकार्यमा सरकार जुटेको खबरलाई पनि मुख पृष्ठमा स्पेश दिएर छापेको छ ।
यसका अलावा स्थानीय तहमा १५ हजार कर्मचारी करारमा भर्ना गर्न लागिएको, सातै प्रदेशमा सचिव खटिएको लगायत समाचारले पनि पत्रपत्रिकामा ठाउँ पाएका छन् ।
संसदीय दलमा देउवासँग भिड्दै प्रकाशमान
कांग्रेस संसदीय दलको निर्वाचनमा सभापति शेरबहादुर देउवासँग पूर्वमहामन्त्री प्रकाशमान सिंह भिड्न लागेको विषयलाई आज नयाँँ पत्रिका दैनिकले मुख्य समाचार बनाएर छापेको छ । तर कांग्रेस संसदीय दलको निर्वाचनमा संस्थापन पक्ष नै हाबी हुने देखिएको छ । प्रत्यक्ष निर्वाचनमा नेता रामचन्द्र पौडेल समूहका धेरै नेता विजयी भए पनि समानुपातिकतर्फ निर्वाचन आयोगमा बुझाएको सूचीको प्राथमिकताका आधारमा सांसद् छनोट गरिए सभापति शेरबहादुर देउवा पक्ष हाबी हुनेछ । समाचार अनुसार बन्द सूचीको प्राथमिकताका आधारमा सांसद् छनोट भएमा देउवाको पक्षमा ३७ र पौडेलको पक्षमा २२ सांसद् हुनेछन् ।
‘नेता रामचन्द्र पौडेल प्रतिनिधिसभा निर्वाचनमा पराजित भएपछि उनको खेमाबाट महामन्त्री डा. शशांक कोइराला, पूर्वमहामन्त्री प्रकाशमान सिंह र कोषाध्यक्ष सीतादेवी यादव संसदीय दलको दाबेदार हुन्, नयाँ पत्रिका दैनिकले आफ्नो खबरको अगाडि लेखेको छ, ‘त्यसमध्ये पनि सिंह दाबेदार हुन् । संसदीय दलमा जित्ने अवस्था नभए महामन्त्री कोइराला उम्मेदवार नबन्ने मनस्थितिमा छन् । तर सिंह भने देउवाको प्रतिष्पर्धीका रुपमा आफूलाई उभ्याउनकै लागि भए पनि उम्मेदवार बन्ने सोचमा छन् ।
निर्वाचनअघि एमालेबाट कांग्रेस प्रवेश गरेका उद्योगपति विनोद चौधरी भने कतै पनि खुलेका छैनन् । कांग्रेसभित्र उनले कुन पक्ष लेलान् भनेर चासोका साथ हेरिएको छ ।
मधेसी रिझाउँदै कांग्रेस, तालमेल टुंगो दुई दिनभित्रै
डा. बाबुराम भट्टराईको अभिव्यक्तिलाई मुख्य समाचार बनाएर छापेको अन्नपूर्ण पोस्ट दैनिकले कांग्रेसले मधेसी दल रिझाउन कसरत गरेको समाचारलाई पनि पहिलो पृष्ठमा समेटेको छ । समाचार अनुसार कांग्रेसले राष्टियसभा निर्वाचनको मनोनयन अघि नै तालमेलको टुंगो लगाउने गरी संघीय समाजवादी फोरम र राजपासँग छलफल अघि बढाएको छ ।
माघ २४ गते हुने निर्वाचनका लागि बुधबार उम्मेदवार मनोनयनको कार्यक्रम रहेकाले सोमबारसम्म उम्मेदवारी टुंगो लगाउने तयारी अन्नपूर्णको समाचारमा उल्लेख छ ।
शपथका लागि रातभर तयारी, शनिबार रातिसम्म मुकाम पुगेनन् प्रदेश प्रमुख
कालिकोटको भाइरल प्रकोपपछिको कान्तिपुरको प्राथमिकतामा प्रदेशसभाका निर्वाचित सदस्यको शपथग्रहण तयारी परेको छ ।
कान्तिपुरका अनुसार सातै प्रदेशका प्रदेशसभाका निर्वाचित सदस्यको आइतबार अस्थायी मुकाममा पद तथा गोपनीयताको शपथ ग्रहण हुने भएपछि रातभर तयारी गरिएको छ । कतिपय प्रदेश प्रमुख तथा सांसद् शनिबार राति अबेरसम्म पनि मुकाम पुगेका छैनन् । उनीहरु बाटोमै रहेको र आइतबार निर्धारित समयभित्र पुग्ने समाचारमा उल्लेख छ ।
सातै प्रदेशमा खटिए सचिव
सरकारले सातवतै प्रदेशको प्रदेश प्रमुख कार्यालयमा सचिव खटाएको छ । प्रदेश प्रमुखको कार्यालयमा खटाइएका सचिव नेपाल सरकारका सहसचिवस्तरका कर्मचारी भएको समाचार नागरिक दैनिकमा छ ।
समाचार अनुसार प्रदेश १ मा रामकृष्ण हुमागाईँ, २ मा लावण्यकुमार खनाल, ३ मा चतुर्भुज ज्ञवाली र ४ मा देवीप्रसाद ज्ञवालीलाई खटाइएको छ । यस्तै प्रदेश ५ मा सनदकुमार दवाडी, ६ मा भरतबहादुर ढुंगाना र ७ मा युवराज सुवेदी खटिएका छन् ।
सामान्य प्रशासन मन्त्रालयले एउटा प्रदेशमा १३ कर्मचारीका दरले ७ वटा प्रदेशमा ९१ कर्मचारी खटाएको छ । प्रधानमन्त्री कार्यालयका अनुसार एउटा प्रदेश प्रमुखका लागि कार्यालयमा १३ र निजी सचिवालयका लागि १२ कर्मचारी खटिनेछन् ।
कालिकोटमा भाइरल ज्वरो, गाउँभरि बिरामी
कान्तिपुर दैनिकले आज कालिकोटमा फैलिएको भाइरल ज्वरोलाई मुख्य समाचार बनाएको छ । समाचार अनुसार प्रकोप नियन्त्रणमा नआउँदा गाउँका सबैजसो बिमारले थलिएका छन् । सदरमुकामस्थित खाडाचक्र नगरपालिकाको २ र ४ वडामा मात्रै ८ सय १८ बिरामी भेटिएका छन् ।
अब स्मार्ट लालपुर्जा
सरकारले जग्गा र जग्गाधनीको विवरण समेटिएको पुरानो लालपुर्जा विस्थापित गरी स्मार्ट लालपुर्जा मार्ड वितरण गर्ने गृहकार्य अघि बढाएको छ ।
कान्तिपुर दैनिकका अनुसार पहिलेका लालपुर्जाको कागज गुणस्तरीय नभएको, मसी खुइलिने र जग्गाधनीको तस्वीर प्रस्ट नभएको जस्ता आम गुनासा सम्बोधन गर्न यसलाई ल्याउन लागिएको हो ।
समाचार अनुसार भूमिसुधार मन्त्रालयले यसको प्रारम्भिक सम्भाव्यता अध्ययन गरिसकेको छ ।
बजेटभन्दा २ खर्ब १८ अर्ब कम खर्च, तैपनि ४८ अर्ब घाटा
नयाँ पत्रिका दैनिककै पहिलो पृष्ठमा बजेटभन्दा २ खर्ब १८ अर्ब कम खर्च भए पनि ४८ अर्ब घाटा लागेको समाचार छ ।
गत आर्थिक वर्ष ०७३–७४ मा सरकारले १० खर्ब ४९ अर्बको बजेट प्रस्तुत गरे पनि वास्तविक खर्च भने जम्मा ८ अर्ब ३१ अर्ब मात्रै भएको समाचारमा उल्लेख छ । सरकारले विनियोजन गरेभन्दा २ खर्ब १८ अर्ब रुपैयाँ कम खर्च हुँदा पनि सरकारले खर्चको स्रोत भने जुटाउन सकेन ।
स्थानीय तहमा १५ हजार कर्मचारी करारमा भर्ना गरिँदै
सरकारले स्थानीय तहलाई करिब १५ हजार प्राविधिक कर्मचारी करारमा भर्ना गर्ने अनुमति दिने तयारी गरेको छ । नयाँ पत्रिका दैनिकका अनुसार, कर्मचारी अभावमा स्थानीय तहले पुँजीगत खर्च गर्न नसकेपछि सरकारले तत्कालका लागि करारमा भर्ना गर्न अनुमति दिन लागेको हो ।
सरकरले स्थानीय तहलाई अहिलेसम्म प्राविधिक र अन्य समूहका आवश्यक कर्मचारी दिन सकेको छैन । कानूनको अभावमा स्थानीय तहले कर्मचारी भर्ना गर्न पाएका थिएनन् ।