१० भदौ, काठमाडौं । प्रभावशाली ट्रिओ इडिन्सन काभानी, केलियन एम्बाप्पे र नेइमारले गोल गर्दा पेरिस सेन्ट जर्मेनले एन्जर्समाथि सहज जित हात पारेको छ ।
शनिबार राति भएको खेलमा लिग वान च्याम्पियन पीएसजीले एन्जर्समाथि ३-१ को जित निकालेको हो ।
घरेलु मैदानमा भएको खेलमा पीएसजीले १२ औं मिनेटमा काभानीको गोलबाट अग्रता लिएको थियो । तर, २१ औं मिनेटमा एन्जर्सले पेनाल्टी पायो, जसमा मन्गानीले गोल गरे ।
दोस्रो हाफमा पीएसजी हावी भयो । उसका लागि ५१ औं मिनेटमा एम्बाप्पेले गोल गरे । खेलको ६६ औं मिनेटमा नेइमारले गोल गरेपछि पीएजीको जित सुनिश्चित भयो ।
काभानीले विश्वकपका क्रममा लागेको चोटका कारण पीएसजीको सुरुवाति दुई खेल गुमाएका थिए ।
