गुगलले आफ्नो सोसल मिडिया प्लेटफर्म गुगल प्लस अन्ततः बन्द गरेको छ ।
पछिल्लो पटक करीब ५ लाख प्रयोगकर्ताका निजी डाटा जोखिममा परेको खुलासा भएसँगै गुगलले यस्तो निर्णय गरेको हो ।
यद्यपि ह्याकिङका कारण जोखिममा परेका ५ लाख प्रयोगकर्ताका डाटाको अनधिकृत दुरुपयोग भने हुन नपाएको दाबी गुगलले गरिरहेको छ ।
गुगलले आफ्नो सोसल मिडिया प्लाटफर्म गुगल प्लसको एप्लिकेसन प्रोग्रामिङ्ग इन्टरेफेस (एपिआइ) मा एक बग फेला पारेको थियो । रिपोर्ट अनुसार उक्त सफ्टवेयर कमजोरीका कारण बाह्य सफ्टवेयर डेभलपर्स तथा ह्याकरहरुले गुगल प्लस प्रयोगकर्ताका प्रोफाइलमा पहुँच स्थापित गरेका थिए ।
यसले प्रयोगकर्ताको प्रोफाइल नाम, इमेल ठेगाना, पेशा, लिंग तथा उमेर जस्ता डाटाहरुलाई असुरक्षित बनाएको थियो । यसबाहेकका प्रयोगकर्ताका अरु कुनै डाटा असुरक्षित नभएको गुगलको दाबी छ ।
गुगल प्लसमा सफ्टवेयरको कमजोरीका कारण सन् २०१५ देखि २०१८ को बीचमा बाह्य सफ्टवेयर डेभलपर्सले गुगल प्लसका प्रयोगकर्ताका प्रोफाइलका डाटाहरु ह्याक गर्ने कोसिस गरेका थिए । गुगलका अनुसार करीब ५लाख गुगल प्लस प्रयोगकर्ताका निजी डाटामा निसाना साँधिएको थियो ।
अहिले उक्त बगको समस्या समाधान गरिएको गुगलले जनाएको छ । गत मार्चमै उक्त बगलाई ठीक पारेको गुगलको दाबी छ । यद्यपि कम्पनीले हालसम्म उक्त विषयलाई गुपचुप राखेको थियो । कानूनी रुपमा बाध्य नभएकोले यसलार्य सार्वजनिक नगरेको गुगलको जिकिर छ ।
एजेन्सीको सहयोगमा
