१५ कात्तिक, बुटवल । ढुंगा गिटी, क्लिंकर ओसार–पसारमा प्रयोग हुँदै आइरहेका १ सय ३८ टिपर प्रहरीले नियन्त्रणमा लिएको छ ।
चालक अनुमतिपत्रविनै सञ्चालन गरेको र एउटाको चलानी बनाएर अर्कै वस्तुको ढुवानी गरेको भेटिएपछि वडा प्रहरी कार्यालय, बुटवलले ती टिपर नियन्त्रणमा लिएको हो ।
प्रहरीको जाँचबुझका क्रममा रोयल्टी नकाट्ने, खानी उत्खनन् प्रमाणपत्रविनै ढुवानी गर्ने, निर्धारित मापदण्डभन्दा झण्डै ५० प्रतिशत बढी ओभरलोड बोक्ने गरेकोसमेत भेटिएको छ ।
बुटवलमा एकैपटक यति धेरै टिपर कारबाहीमा परेको पहिलोपटक हो ।
वडा प्रहरी कार्यालय, बुटवलका प्रमुख प्रहरी निरीक्षक हेम केसीले प्रचलित नीति–नियम र ट्राफिक नियम उल्लंघन गरेर सञ्चालित टिपर नियन्त्रणमा लिइएको जानकारी दिए ।
समातिएका टिपरलाई आवश्यक कानुनी कारबाहीका लागि सम्बन्धित जिल्ला समन्वय समिति, ट्राफिक प्रहरी र यातायात व्यवस्था कार्यालयमा पठाइने वडा प्रहरी कार्यालय, बुटवलका प्रमुख केसीले अनलाइनखबरलाई जानकारी दिए ।
टिपरको चेकजाँचमा कडाई नहुँदा राज्यका नीति नियमको उल्लंघन भएको, रोयल्टी गुमेको र अवैध उत्खनन् भएकाले अनुगमनलाई तीव्र पारिएको प्रहरी भनाइ छ ।
टिपरलाई निर्वाध सञ्चालन गर्न व्यावसायीले ट्राफिक प्रहरीसँग सेटिङ मिलाएर मासिक घुस दिने गरेको गुनासोबीच वडा प्रहरीले चालेको कदमलाई सर्वसाधारणले प्रशंसा गरेका छन् ।
सरोकारवालाहरुले नियमनकारी निकायले चेकजाँच नगर्दाको फाइदा उठाएर टिपर व्यवसायीहरुले मनपरी गरेको भन्दै कडाभन्दा कडा कारबाहीको मागसमेत गरेका छन् ।