२४ पुस, काठमाडौं । सरकारले संसद कब्जा गर्न खोजेको आरोप स्वयं सत्तारुढ सांसदले लगाएका छन् । संघीय समाजवादी फोरम नेपालकी सांसद सरिता गिरीले आइतबार संसदमा भएको घटनालाई संसद कब्जा गर्ने सरकारको प्रयासका रुपमा विश्लेषण गरेकी हुन् ।
मंगलबार राजधानीमा आयोजित एक कार्यक्रममा नेतृ गिरीले प्रधानमन्त्री केपी शर्मा ओलीको सम्बोधनपश्चात् संसदमा देखिएको दृश्यले नियामावली ‘ब्रेक–डाउन’ भएको बताइन् ।
उनले भनिन्,‘प्रधानमन्त्रीको अभिव्यक्तिपश्चात् प्रमुख प्रतिपक्षी दलले बोल्न पाउँ भनेर रोष्टम घेरिरहेको छ । त्यो हुँदाहुँदै मर्यादापालकलाई रोष्ट्रममा घेर्न लगाएर कार्यसुचीको अर्को एजेण्डामा प्रवेश भयो । संसदीय परम्पराअनुसार त्यो रिभर्स हुन्छ कि हुँदैन (मलाई थाहा छैन), तर म यसलाई नियमावली ब्रेकडाउन भएको भन्छु ।’
यो सुनियोजित भएको उनको दाबी छ । त्यसको ब्याख्या गर्दै गिरीले भनिन्, ‘यो एउटा यस्तो पार्टीको तर्फबाट भइरहेको छ, जसको पोलिटिकल्ली थ्योरी जनताको बहुदलीय जनवाद छ । जवजले भन्छ कि जुन दिन हाम्रो शक्ति पुग्छ, त्यो दिन फोर्सफुल्लीपनि शक्ति क्याप्चर गर्छौं । आइतबारको घटनालाई यदि राजनीतिक दृष्टिकोणले विश्लेषण गर्ने हो भने सरकारले संसदलाई कब्जा गर्ने प्रयास गरेको छ ।’
कांग्रेस पनि संसदका लागि भन्दापनि प्रतिपक्षका लागि अगाडि आएको जस्तो देखिएको टिप्पणी गरिन् ।
सभामुखले नियम उल्लंघन गरेको र प्रमुख प्रतिपक्षी दलले पनि आफ्नो मात्रै कुरा गरेको उनको गुनासो छ ।
‘डिजिटल एक्शन प्लान’बारे सांसदहरुले राखेको धारणालाई प्रधानमन्त्री ओलीले असभ्य भनेकोमा आपत्ति जनाइन् । सत्तारुढ फोरमकी सांसद गिरीले प्रश्न गरिन्, ‘सांसदलाई असभ्य भन्ने अधिकार प्रधानमन्त्रीलाई कसले दियो ? सभामुखले उहाँको बोलीमा नियन्त्रण गर्नुपर्दथ्यो । तर, सभामुखले गर्नुभएन । सभामुख फेल हुनुभएको छ ।’
प्रधानमन्त्रीले सम्बोधनमा राजपा र फोरम नेपाललाई पूर्ण रुपमा बेवास्ता गरेको पनि उनले बताइन् ।
सांसदले प्रधानमन्त्रीसँग प्रश्न सोध्न पाउनुपर्ने उनको धारणा छ । तर, सभामुखले के सोच राखेर सांसदहरुलाई प्रश्न सोध्न नदिएको हो भन्ने अहिले धेरै नबोल्ने गिरीले बताइन् ।
