५ साउन, काठमाडौं । पूर्वउपसचिव विष्णुप्रसाद शर्माको कलंकीस्थित घरमा गोली चलेको घटनाको अनुसन्धानमा छिमेकीको संलग्नता देखिन सक्ने बलियो आधार फेला नपरेको प्रहरीले जनाएको छ ।
सोमबार साँझ शर्माको घरको सिसा एक्कासी फुटेको थियो । लगत्तै, गएर हेर्दा २.२२ एमएमको हतियारको गोली भेटिएको थियो ।
अनुसन्धानको सिलसिलामा प्रहरीले छिमेकी एवं पूर्वइञ्जिनियर शुभांकर खनाललाई सोधपुछका लागि नियन्त्रणमा लिएको थियो । तर, उनको संलग्नता देखिने आधार नभेटिएपछि साधारण तारेखमा छाडिएको छ ।
खनालको घरबाट बरामद दुई थान हतियार र ५० राउण्ड गोलीको विषयमा भने प्रहरीले वैज्ञानिक छानविन थालेको छ । काठमाडौं प्रहरी परिसर, टेकुका डीएसपी होविन्द्र बोगटीले हतियारको फरेन्सिक जाँचका लागि सामाखुशीस्थित केन्द्रीय विधि विज्ञान प्रयोगशाला पठाइएको बताए ।
‘हामीले ब्यालेस्टिक जाँचका लागि पठाएका छौं’, उनले अनलाइनखबरसँग भने, ‘ल्याबले रिपोर्ट दिएपछि मात्रै थप विषय खुल्ला ।’
यो पनि पढ्नुहोस कलंकी प्रकरणः छिमेकीको लाइसेन्स प्राप्त हतियारबाटै गोली प्रहार ?प्रहरीसँग बयानका क्रममा खनालले आफ्नो हतियारबाट गोली चलेको अस्वीकार गरेको जनाइएको छ ।
प्रारम्भिक अनुसन्धानले दूर्घटनावश गोली चलेको हुनसक्ने देखाएको प्रहरीले जनाएको थियो । तर, गोली भेटिएको कोठामा शर्माकी छोरी अध्ययरत् भएकाले घटनापछि कुनै कारण थियो कि भन्नेतर्फ पनि प्रहरीले अनुसन्धान गरिरहेको छ ।
प्रयोगशालाको रिपोर्ट आएपछि गोली कोठामा आएको दिशाबारे पनि खुल्नेछ । त्यसको आधारमा पनि अनुसन्धानको दायरालाई साँघुरो बनाउन सहयोग पुग्ने प्रहरीले जनाएको छ ।