२८ असोज, काठमाडौं । ‘रोपेर फूल गोदावरी, सजाऔं घर आँगन वरिपरी’ भन्ने मूल नाराका साथ ‘१३ औं गोदावरी फूलको प्रदर्शनी’ ललितपुरमा हुने भएको छ ।
नेपालीहरुको दोस्रो ठूलो चाड तिहारलाई लक्षित गरेर फ्लोरिकल्चर एशोसिएसन नेपालले आगामी कात्तिक १ गतेदेखि ४ गतेसम्म ललितपुरको जावलाखेलस्थित खेल मैदानमा सो प्रदर्शनी आयोजना गर्न लागेको हो ।
एशोसिएसनले मंगलबार काठमाडौंमा पत्रकार सम्मेलन गरी गोदावरी फूलको व्यवसाय प्रवर्द्धन गर्ने उद्देश्यका साथ सो मेला आयोजना गर्न लागिएको जानकारी दिएको हो ।
एशोसिएशनका उपाध्यक्ष एवम् प्रर्दशनी आयोजक समितिका संयोजक शिवबहादुर खड्काले प्रर्दशनीमा ४९ वटा प्रदर्शनी कक्षहरु रहने जानकारी दिए ।
प्रदर्शनीमा यस सिजनमा फूले सयपत्री, मखमली तथा अन्य सिजनल फूल विरुवा समेत समावेश गरिनेछ । नेपालको ४३ जिल्लामा पुष्पखेतीको विस्तार भइसकेको पनि एशोसिएशनले जनाएको छ ।
