नेपाल एयरलाइन्समार्फत् चीनबाट ल्याइयो स्वास्थ्य सामग्री

१६ चैत, काठमाडौं । कोरोना भाइरसबाट संक्रमितहरुको उपचारका लागि आवश्यक स्वास्थ्य सामग्री चीनबाट लिएर नेपाल एयरलाइन्सको हवाईजहाज काठमाडौं आइपुगेको छ । नेपाल एयरलाइन्सका अनुसार चीन गएको जहाज आइतबार बिहान साढे पाँच बजे त्रिभुवन अन्तर्राष्ट्रिय विमानस्थलमा अवतरण गरेको थियो ।

कोरोना परीक्षण किट, स्वास्थ्यकर्मीहरुले सुरक्षाका लागि लगाउने विशेष प्रकारको पोशाक पीपीई लगायतका सामग्री लिएर वाइडबडी जहाज काठमाडौं आएको एयरलाइन्सले जनाएको छ । ती सामग्री लिन शनिबार मध्याह्न वाइबडी चार्टर विमान ग्वाङ्झाओ गएको थियो ।

चीनबाट स्थलमार्ग हुँदै ल्याउन लागिएका स्वास्थ्य सामग्रीहरु भने निर्यात गर्नेको सूचीमा नरहेको भन्दै तिब्बतमा रोकिएका छन् । ती सामग्रीलाई पनि अब हवाईजहाजबाट ल्याउन पहल गर्ने नेपाल सरकारका अधिकारीहरु बताउँछन् ।

यसैबीच, नेपालका लागि चिनियाँ राजदूत होउ यान्छीले सिचुआन प्रान्त सरकार, सिचुआन प्रान्तीय लगानी समूह, चिनियाँ दूतावास, ज्याक मा फाउन्डेसन र अलिबाबा फाउन्डेसनले चन्दा दिएका आपतकालीन सामाग्रीहरू (पीपीई, थर्मोमिटरलगायत सामान) बोकेर चिनियाँ जहाज काठमाडौं प्रस्थान गरेको जानकारी दिएकी छिन् । स्वास्थ्य परीक्षणका किट पनि नेपाल ल्याउने तयारी भइरहेको नेपालस्थित चिनियाँ दूतावासले जनाएको छ ।