११ वैशाख, काठमाडौं । भक्तपुरबाट काठमाडौं आउँदै गरेको मोटरसाइकल कौशलटारमा दुर्घटना हुँदा एक जनाको मृत्यु भएको छ ।
बा ३९ प ५७४१ नम्बरको मोटरसाइकल बिहीबार साँझ करिब साढे पाँच बजे आफैँ अनियन्त्रित भई सडकको रेलिङमा ठोक्किँदा मध्यपुर ठिमी नगरपालिका-५ भुलाङखेलका ३० वर्षीय अजय श्रेष्ठको मृत्यु भएको हो ।
मध्यपुर अस्पताल ठिमी अस्पतालमा उपचारको क्रममा साँझ सवा ६ बजेतिर श्रेष्ठको मृत्यु भएको महानगरीय प्रहरी परिसर भक्तपुरका डीएसपी दीपक गिरीले जानकारी दिए ।
पानी परिरहेको बेला मोटरसाइकल चिप्लिएर दुर्घटना भएको हुन सक्ने प्रहरीले प्रारम्भिक अनुमान गरेको छ । डिएसपी गिरीले दुर्घटनाको अनुसन्धान भइरहेको जानकारी दिए ।
