७ जेठ, काठमाडौं । भारतले आज नेपालमा रहेका आफ्ना नागरिकलाई हवाई सेवामार्फत् उद्धार गरेको छ । लामो लकडाउन र व्यवसायिक उडानमाथिको प्रतिबन्धपछि नेपालमा अडि्कएका नागरिकलाई लिन एयर इन्डियाको जहाज काठमाडौं आएको हो।
त्रिभुवन विमानस्थल कार्यालयका अनुसार बुधबार बिहान एक नाबालकसहित एक सय ६५ जना यात्रु लिएर एयर इन्डियाको जहाज उडेको हो । नेपालमा रहेका धेरैजसो मजदुर सडक मार्गबाटै भारत फर्किसकेका छन् ।
दूतावास तथा विभिन्न मिसनमा कार्यरत कर्मचारी, व्यापारीलगायत नेपालमा अडि्कएका अन्य व्यक्तिलाई भने भारतले जहाजमा फिर्ता लगेको छ । लकडाउन प्रारम्भ भएसँगै नेपालबाट करिब ५ हजार मानिस स्वदेश फर्किसकेका छन् ।
