२९ जेठ, काठमाडौं । कोरोना भाइरस (कोभिड-१९) को संक्रमण नियन्त्रणमा सरकार असफल भएको भन्दै बालुवाटारमा प्रदर्शन भएको छ ।
सरकारविरुद्ध प्रदर्शन गर्न बुधबार स्वस्तफुर्त जम्मा भएका उनीहरुले स्वास्थ्य सामाग्री खरिद पारदर्शी हुनुपर्ने, आरडीटी रोकेर पीसीआर टेष्ट गर्नुपर्ने, कर तिर्ने ताकेता खारेज गर्नुपर्ने माग गरेका थिए ।
प्रदर्शनकारीलाई तिरतवितर बनाउन प्रहरीले पानीको फोहोरा हानेको थियो । तर प्रदर्शन जारी राखेपछि प्रहरीले अश्रुग्यास समेत हानेको छ ।
महानगरीय प्रहरी परिसर काठमाडौंका प्रमुख श्याम ज्ञवालीले निषेधित क्षेत्रमा प्रदर्शन गरेकाले केहीलाई नियन्त्रणमा लिइएको जानकारी दिए ।
दुई दिनअघि पनि बालुवाटारमा सरकारविरुद्ध शान्तिपूर्ण प्रदर्शन भएको थियो ।
तर बिहीबार भएको प्रदर्शनमा दुई हजारभन्दा बढी सहभागी भएका थिए । ११ चैतदेखि लकडाउन सुरु भएयता ठूलो प्रदर्शन भएको हो ।
