२ साउन, काठमाडौं । नेपाल राष्ट्र बैङ्कका पूर्व कार्यकारी निर्देशक त्रिलोचन पंगेनीले आर्थिक वर्ष २०७७/७८ का लागि आएको मौद्रिक नीतिले सबै वर्गलाई समेटेको प्रतिक्रिया दिएका छन् ।
अनावश्यक खर्च कटौती गर्ने तथा कोभिड प्रभावित क्षेत्रलाई राहत हुने किसिमको नीति तर्जुमा गरिएको उनले बताए । कोरोनका कारण अर्थतन्त्रले शिथिल बनेको अर्थतन्त्रलाई राम्रो दिशामा ल्याउन यो मौद्रिक नीतिले सहयोग पुर्याउने पनि उनले बताए ।
‘समग्रमा मौद्रिक नीति राम्रो छ, यसले सबै वर्गलाई समेट्ने कोसिस गरेको छ’ उनले भने, ‘यो एकदमै राम्रो छ, मलाई विश्वास छ यसले मुलुकको अर्थतन्त्रलाई सकारात्मक दिशामा अगाडि लैजाने छ।’
उनले महामारीका बेला यत्तिको मौद्रिक नीति आउनु राम्रो भएको बताए । उनले राष्ट्र बैङ्कलाई पूर्व कार्यकारी निर्देशकहरूले दिएको सुझाव स्मरण गर्दै भने, ‘हामीले कोभिडका बेला कस्तो मौद्रिक नीति ल्याउने भन्ने सुझाव पनि दिएका छौं, धेरै समेटिएका छन् ।’
