१९ फागुन, काठमाडौं । वाणिज्य, आपूर्ति तथा उपभोक्ता संरक्षण विभागको उपत्यका बाहिरका पाँच कार्यालयले सात महिनामा एक सय ६५ वटा व्यावसायिक फर्मलाई कारबाही गरेको छ । उपभोक्ता हित विपरितको काममा संलग्न रहेका ती फर्मलाई जरिवाना गरिएको छ ।
आर्थिक जरिवानाबापत ४६ लाख २३ हजार रूपैयाँ राजश्व संकलन भएको पनि विभागले जनाएको छ । उपत्यकाबाहिरका पाँच जिल्लामा चालु आर्थिक वर्षमा उक्त कारबाही गरिएको र विभागका प्रवक्ता शिवराज सेडाइँले बताए ।
विभाग मातहतका मोरङ, पर्सा, रुपन्देही, बाँके र कैलाली जिल्लामा उपभोक्ता संरक्षण ऐन अन्रगत अनुगमन गरिएको विभागको भनाइ छ । साउनदेखि पुस माघममान्तसम्म नौ सय ९० वटा व्यावसायिक फर्म तथा कम्पनीमा अनुगमन गरिएको थियो ।
मोरङका १२, पर्साका १०२, बाँकेका ९ र कैलालीका ४२ वटा कम्पनीलाई कारवाही गरिएको विभागले जनाएको छ । अनुगमनका क्रममा फेला परेका ४६ लाख २३ हजार रुपैयाँ बराबरको अखाद्य वस्तु नष्ट गरिएको, १० वटा फर्मको कारोबार रोक्का राखिएको र २७ वटा फर्म तथा कम्पनीलाई स्पष्टीकरण सोधिएको विभागले जनाएको छ ।
