धनगढीले जित्यो उपमेयर कप राष्ट्रिय महिला लिग छनौट प्रतियोगिताको उपाधि

२८ कात्तिक, काठमाडौं। ललितपुर महानगरपालिका विरुद्ध शानदार रुपमा पुनरामागम गरेको धनगढी उपमहानगरपालिकाले उपमेयर कप राष्ट्रिय महिला लिग छनौट प्रतियोगिताको उपाधि जितेको छ ।

एन्फा कम्प्लेक्स सातदोबाटोमा आइतबार भएको फाइनलमा धनगढीले ललितपुरलाई पेनाल्टी सुटआउटमा ३-१ ले पराजित गर्दै च्याम्पियन बनेको हो ।

निर्धारित समयको खेल ३-३ गोलको बराबरीमा सकिएपछि खेलको नतिजा सुटआउटमा भएको थियो । जसमा धनगढीले बाजी मार्‍यो ।

पेनाल्टी सुटबउटमा धनगढीकी रेबिका पाण्डे, रेखा पौडेल र बिर्सना चौधरीले गोल गरिन् । ललितपुरकी निर्मला बिकले गोल गरिन् ।

त्यसअघि ललितपुरले दुई गोलको अग्रता जोगाउन नसक्दा धनगढीले पुनरागमन गरेको थियो ।

खेलको १२औं मिनेटमा मनिषा सेनले गोल गर्दै ललितपुरलाई अग्रता दिलाएकी थिइन् । १६ औं मिनेटमा निर्मला बिकले गोल गर्दै ललितपुरको अग्रता दोब्बर पारिन् । तर २४ औं मिनेटमा धनगढीकी सिमा रावलले गोल गर्दै स्कोर घटाइन् ।

३९ औं मिनेटमा रजनी थोकरले गोल गर्दै ललितपुरलाई ३-१ को अग्रता दिलाईन् । पहिलो हाफमा ललितपुरले दुई गोलको अग्रता कायमै राखेको थियो । तर ४९ औं ६४ औं मिनेटमा चन्द्रा भण्डारीले गोल गरेपछि धनगढीले खेल बराबरी गरेको थियो ।

च्याम्पियन धनगढीले नगद ५ लाख नगद प्राप्त गरेको छ । उपविजेता बनेको ललितपुरले ३ लाख प्राप्त गरेको छ । फाइनल पुगेका दुवै टोली राष्ट्रिय महिला लिगमा समेत छनोट भइकसेका छन् ।

व्यक्तिगत विधातर्फ पनि धनगढीकै वर्चस्व रह्यो । धनगढीका उषा नाथ उत्कृष्ट गोलकिपर, सरस्वती रोकाय उत्कृष्ट मिडफिल्डर, चन्द्रा भण्डारी उत्कृष्ट फरवार्ड र राघवान्दर कार्की उत्कृष्ट प्रशिक्षक घोषित भए । ललितपुरकी सृजना सिंह उत्कृष्ट डिफेन्डर बनिन् । उत्कृष्ट सबैले २०-२० हजार प्राप्त गरे ।

झापाको कन्काई नगरपालिकाकी दिपा शाहीले उत्कृष्ट खेलाडी बन्दै नगद ५० हजार हात पारिन् । कैलालीको जानकी नगरपालिकाले फेयर प्लेको अवार्डसहित नगद ५० हजार पायो ।