काठमाडौंका ३ निर्वाचन क्षेत्रमा माओवादीको दाबी

२६ साउन, काठमाडौं । संघ र प्रदेशको चुनाव घोषणासँगै सत्तारुढ गठबन्धनमा सिट बाँडफाँटका बैठक चलिरहेका छन् । भागबन्डाको टुंगो लागि नसकेको भए पनि दाबी-प्रतिदाबी भने चलिरहेकै छ ।

यस्तोमा काठमाडौंमा निकै कमजोर रहेको नेकपा माओवादी केन्द्रले यहाँका कति क्षेत्रमा दाबी गर्ला भन्ने चासो छ । काठमाडौं जिल्लामा १० वटा संघीय निर्वाचन क्षेत्र छन् । स्रोतका अनुसार माओवादीले यसपटकको चुनावमा काठमाडौंका तीन क्षेत्रमा दाबी गरेको छ ।

शान्ति प्रक्रियामा आए लगत्तैको पहिलो संविधानसभा निर्वाचनमा तत्कालीन १५ मध्य ६ वटा क्षेत्रमा जितेको थियो । २०७० को दोस्रो संविधानसभा निर्वाचनमा भने माओवादीले एउटा निर्वाचन क्षेत्र पनि जित्न सकेन ।

२०७४ मा नेकपा एमालेसँग वाम गठबन्धन गर्दा तीन वटा निर्वाचन माओवादी केन्द्रले पाएको थियो । काठमाडौं-१, ६ र १० मा माओवादीले उम्मेदवारी दिएको थियो तर सबै पराजित भएका थिए । क्षेत्र नम्बर १ मा अनिलकुमार शर्मा, ६ मा झक्कुप्रसाद सुवेदी र १० मा हितमान शाक्य उम्मेदवार बनेका थिए ।

माओवादी केन्द्रका पोलिटब्युरो सदस्य एवम काठमाडौं जिल्ला इन्चार्ज हिमाल शर्माले पुरानै क्षेत्रमा आफ्नो दाबी गरेको बताए । ‘२०७४ मा एमालेसँग गठबन्धन गर्दा पाएका क्षेत्र नै हुनुपर्छ भन्ने छ,’ शर्माले भने ।

को-को छन् आकांक्षी ?

काठमाडौं क्षेत्र नम्बर १ नेपाली कांग्रेसका नेता प्रकाशमान सिंहले लगातार तीन पटक चुनाव जितेको क्षेत्र हो । कांग्रेससँगै गठबन्धन गर्दा माओवादीले उक्त क्षेत्र पाउन गाह्रो छ । यद्यपि निर्वाचन क्षेत्रहरु १, ६, ९ र १० मध्य तीनवटा चाहिँ हुनैपर्ने माओवादी अडान छ ।

क्षेत्र नम्बर १ पाए यसअघिकै उम्मेदवार अनिल शर्मा दोहोरिने सम्भावना छ । त्यस्तै क्षेत्र नं. ६ मा हिमाल शर्मा नयाँ आकांक्षी छन् । यसअघि उम्मेदवारी दिएका झक्कु सुवेदी पनि आकांक्षी नै हुन् ।

अघिल्लो पटक काठमाडौं क्षेत्र नम्बर १० बाट उठेका हितमान शाक्य यसपटक काठमाडौं ९ बाट उठ्न चाहान्छन् । त्यस्तै काठमाडौं क्षेत्र न. १० मा अन्जना विशंखेले चाहाना राखेकी छिन् ।

दाबी गरेको क्षेत्रमा कति छ माओवादी मत ?

अघिल्लो चुनावमा एमालेसँग तालमेल गरेर काठमाडौं क्षेत्र नम्बर १ मा अनिल शर्माले ५ हजार ३ सय ३६ मत ल्याएका थिए । हालै सम्पन्न स्थानीय तहको निर्वाचनमा माओवादीले पाएको मत भने १ हजार १५९ मात्रै हो । काठमाडौं क्षेत्र नं. १ मा काठमाडौं महानगरका वडा नं. १०, ११, २९ र ३१ वडा पर्दछन् ।

काठमाडौं क्षेत्र नं. ६ मा उठेका सुवेदीले अघिल्लो चुनावमा एमालेसँगको तालमेलमा १५ हजार ४८५ मत पाएका थिए । हालै सम्पन्न स्थानीय तहको वडामा माओवादीले पाएको मत भने २ हजार ४६२ मात्रै छ ।

यो निर्वाचन क्षेत्रमा काठमाडौं महानगरका वडा नं. २६, २७ र २८ पर्दछन् । त्यस्तै टोखा नगरपालिकाका वडा नं. १, ८, ९, १० र ११ तथा तार्केश्वर नगरपालिकाका १, २, ६, ७, ८, ९, १० र ११ पर्दछन् ।

काठमाडौं क्षेत्र नं. ९ मा माओवादीले पाएको वडागत मत ७९५ मात्रै छ । यो क्षेत्रमा काठमाडौं महानगरका वडा नं. १२, १४, २१ र २२ पर्दछन् । त्यस्तै नागार्जुन नगपालिकाका वडा नं. ६, ७, ८, ९, १० तथा चन्द्रागिरि नगरपालिकाका वडा नं. १, १२, १३, १४, १५ पर्दछन् ।

काठमाडौं क्षेत्र नं. १० मा एमालेसँग तालमेल गरेर लड्दा हितमान शाक्यले अघिल्लो पटक २१ हजार ९०७ मत ल्याएका थिए । हालै सम्पन्न स्थानीय तहमा माओवादीले वडागत रुपमा यो क्षेत्रमा पाएको मत ७ हजार २ सय ६९ रहेको छ ।

यो क्षेत्रमा दक्षिणकाली र कीर्तिपुर नगरपालिका तथा र चन्द्रागिरि नगरपालिकाका वडा नं. २, ३, ४, ५, ६, ७, ८, ९, १० र ११ वडा पर्दछन् ।