हरिबोललाई प्रचण्डले गरे राजनीतिक सल्लाहकारको प्रस्ताव

१३ पुस, काठमाडौं । प्रधानमन्त्री पुष्पकमल दाहाल प्रचण्डले आफ्नो कार्यकाल सफल बनाउनका लागि पार्टीका उपमहासचिव हरिबोल गजुरेलसँग सहयोग मागेका छन् ।

गजुरेललाई बोलाएर प्रचण्डले प्रधानमन्त्रीलाई सहयोग पुग्नेगरि केही नियुक्ति दिने प्रस्ताव गरेका थिए । तर, गजुरेलले आफूलाई पार्टीमै भूमिका दिन आग्रह गरेका थिए ।

‘अध्यक्षले मलाई सहयोग गर्नुपर्‍यो, मलाई सहयोग गर्ने गरि तपाईंलाई नियुक्ति दिन्छु भन्ने प्रस्ताव गर्नुभयो,’ गजुरेलले अनलाइनखबरसित भने, ‘तर, मैले अहिले पार्टी कमजोर छ । मलाई पार्टी भूमिकामा केन्द्रित हुनेगरि जिम्मेवारी दिनुहोस् भनेँ ।’

गजुरेलले अहिले पार्टी कमजोर भएको भन्दै आफूले पार्टी निर्माणमै केन्द्रित हुन चाहेको बताए ।