महानगरले ६ करोड लगानीमा बालाजुमा ‘स्केटबोर्ड’ निर्माण गर्ने

१७ जेठ,काठमाडौं । काठमाडौं महानगरपालिकाले ‘स्केटबोर्ड’ निर्माण गर्ने भएको छ । ‘स्केटबोर्ड’ निर्माणका लागि महानगरपालिकाले टेण्डर आह्वान समेत गरिसकेको छ ।

महानगरको सार्वजनिक निर्माण विभागका प्रमुख राम थापाका अनुसार करिब ६ करोड रूपैयाँ लागतमा बालाजुमा ‘स्केटबोर्ड’ निर्माण गरिने छ ।

‘बालाजुको १७ रोपनी जग्गामा ‘स्केटबोर्ड’ निर्माणका लागि टेण्डर प्रक्रियामा गएका छौं, ठेक्का लागेको ६ महिनाभित्र सक्ने महानगरको लक्ष्य रहेको छ’ थापाले भने ।

उनले महानगरपालिकाले अन्य स्थानमा पनि जग्गा खोजिरहेको भन्दै जग्गा प्राप्तिपछि भलिबल कोर्ट, साइक्लिङ ट्र्याक निर्माण जस्ता कार्यहरुलाई पनि अगाडि बढाउने बताए ।