सशस्त्र प्रहरी र आश्रित परिवारलाई चन्द्रागिरि, मौलाकाली र लुम्बिनी केबलकारमा विशेष छुट

काठमाडौं । सशस्त्र प्रहरी बल र उनका आश्रित परिवारले आईएमई ग्रुप अन्तर्गतका केबलकार कम्पनीहरु चन्द्रागिरि हिल्स, मौलाकाली र लुम्बिनी केबलकारको टिकट मूल्यमा विशेष छुट पाउने भएका छन् ।

शुक्रबार सशस्त्र प्रहरी बलको प्रधान कार्यालय र तीनवटै केवलकार कम्पनीहरुले छुट प्रदान सम्बन्धी सम्झौता गरेका हुन् ।
सम्झौता पत्रमा सशस्त्र प्रहरी वरिष्ठ उपरीक्षक प्रविण कँडेल र मौलाकाली तथा लुम्बिनी केवलकारका तर्फबाट कम्पनीका प्रतिनिधि रुद्र पौडेल, चन्द्रागिरि हिल्सका तर्फबाट महाप्रबन्धक सन्जिव थापाले हस्ताक्षर गरे ।

सम्झौता अनुसार बहालवाला सशस्त्र प्रहरी कर्मचारीहरु, अवकाश प्राप्त सशस्त्र प्रहरी कर्मचारी, आश्रित परिवारहरु साथै नेपाल एपी एफ स्कुलमा कार्यरत शिक्षक तथा कर्मचारीहरुले केवलकारको टिकट मूल्यमा २० प्रतिशत छुट प्राप्त गर्ने छन् ।

सशस्त्र प्रहरी बलको कल्याणकारी योजना अन्तर्गत भएको सम्झौता बमोजिम यो छुट प्राप्त गर्न बहालवाला सशस्त्र प्रहरी कर्मचारीहरुले सम्बन्धित कार्यालयले प्रदान गरेको परिचय पत्र, अवकाश प्राप्त सशस्त्र प्रहरी कर्मचारीहरुले पेन्सन पट्टा र आश्रित परिवारहरुले नाता प्रमाणित कागजात देखाउनु पर्ने छ ।