अन्तर्राष्ट्रिय विमानस्थल पीपीपी मोडलमा चलाउने तयारी छ : प्रधानमन्त्री

१० पुस, काठमाडौं । प्रधानमन्त्री पुष्पकमल दाहाल प्रचण्डले नेपालका अन्तर्राष्ट्रिय विमानस्थलहरुको सञ्चालनमा सार्वजनिक–निजी साझेदारी मोडेलमा अघि बढाउने विकल्पमा छलफल भएको बताएका छन् ।

सरकारको एक वर्ष कार्यकाल पुगेको अवसरमा देशबासीका नाममा सम्बोधन गर्दै उनले यस्तो जानकारी गराएका हुन् । ठूलो खर्च भएका पोखरा र भैरहवा विमानस्थललाई पूर्ण सञ्चालनमा ल्याउन र भैरहवा अन्तर्राष्ट्रिय विमानस्थलबाट छिमेकी मुलुकका नजिकका विमानस्थलसम्म कम उचाइमा उडान गर्ने साना विमान सञ्चालनको पहल भइरहेको उनले जानकारी दिए ।

उनले भैरहवा र पोखरा विमानस्थलबाट अन्तर्राष्ट्रिय उडान र अवतरण गर्ने विमानहरूलाई इन्धन, टर्मिनल, ग्राउण्ड ह्याण्डलिङ र अन्य सेवा शुल्कमा सहुलियत दिएर प्रोत्साहन गरिने जानकारी दिए ।

निजगढ विमानस्थलको समेत निर्माण सुनिश्चित गरी काठमाडौं, भैरहवा र पोखरा विमानस्थलको विस्तार तथा सञ्चालन पनि सार्वजनिक–निजी साझेदारी मोडेलमा अघि बढाउने विकल्पमा समेत छलफल भएको उनको भनाइ छ ।

यस वर्ष पर्यटकको संख्या लगभग रेकर्डकै रूपमा वृद्धि भएको भन्र्द उनले क्षेत्रगत तयारी र योजनाबाट अर्को वर्ष पर्यटकको संख्या झण्डै दोब्बर बनाउने उनको दाबी छ ।

लुम्बिनी वरपरको ८ वर्गकिलोमिटरको ग्रेटर लुम्बिनी परियोजना अगाडि बढ्दै गरेको जानकारी उनले दिए । ग्रेटर लुम्बिनी अन्तर्गत रामग्राम र कपिलवस्तुको गुरुयोजना अगाडि बढिरहेको उनले बताए ।