‘उपहार’को रनटाइम साढे २ घण्टा तय, बिहीवार प्रिमियर तयारी

काठमाडौं । फागुन २५ गतेदेखि प्रदर्शन तयारीमा रहेको फिल्म ‘उपहार’को पोस्ट-प्रडक्सन सकिएको छ । निर्देशक ज्ञानेन्द्र देउजाले फिल्मलाई विहीबार दिउँसो प्रिमियर गर्न लागिएको बताए ।

केन्द्रीय चलचित्र जाँच समितिबाट युनिभर्सल सर्टिफिकेट प्राप्त गरेको फिल्मको रनटाइम २ घण्टा २३ मिनेट तय छ । ‘हामी पोस्ट-प्रडक्सनपछि अब प्रिमियरको तयारीमा छौं । जतिचाँडो दर्शकलाई देखाउन उत्साहित पनि’ निर्देशक देउजाले अनलाइनखबरसँग भने ।

गतसाता पहिलो सन्तानलाई स्वागत गरेकी अभिनेत्री रेखा थापाले अमेरिकाबाटै फिल्मको भर्चुअल पब्लिसिटी गरिरहेकी छन् । फिल्मको ट्रेलरले कथावस्तुबारे दर्शकलाई जानकारी गराइसकेको छ । जसमा रेखा चियावालीको चरित्रमा छिन् । महानगर प्रहरीले चिया पसल भत्काएको दृश्यले फिल्मको द्धन्द्ध स्पष्ट हुन्छ ।

रेखाले आफ्ना अघिल्ला फिल्ममा गरेको गल्तीलाई ‘उपहार’मा सच्याएको अभिव्यक्ति दिइसकेकी छन् । जसले गर्दा यो फिल्म महत्वपूर्ण हुने अपेक्षा गर्न सकिन्छ ।

रेखा फिल्मस् र कपनगढी सिनेमा प्रालिको व्यानरमा बनेको फिल्ममा रेखासहित पूजा शर्मा, मुकुन भुषाल, बेनिशा हमाल, तेज गिरी, समर्पणजंग कार्की, सुष्मा कार्की, शिशिर राणा, राजाराम पौडेल, किरण केसी, अंशु महर्जन, विनोद पौडेल, आशा भुुषाल, शोभारस घिमिरे, मन्जु श्रेष्ठ, कमल भट्ट, राइडर प्रशान्त र सरिता राजोपाध्यायलगायतको अभिनय छ ।

बलराम शाही ठकुरी कार्यकारी निर्माता रहेको फिल्मका निर्माता सुलभ प्रतिक र समीक्षा देउजा हुन् । फिल्ममा विष्णु कल्पित घिमिरेको छायांकन, अर्जुन पोखरेल र बाबुल गिरीको संगीत, मित्र गुरुङको सम्पादन, सुलक्षण भारतीको कथा, भारतीका साथै अभिमन्यू निरवी र माधव शर्माको पटकथा तथा संवाद, अनुपम गौतमको भीएफएक्स र रोशन श्रेष्ठको द्वन्द्व निर्देशन छ ।