आईपीएलमा आरसीबीको दोस्रो हार, कोलकाता दोस्रो स्थानमा

१७ चैत, काठमाडौं । इन्डियन प्रिमियर लिग (आईपीएल)को जारी सिजनमा रोयल च्यालेन्जर्स बेंग्लोर (आरसीबी)ले दोस्रो हार व्यहोरेको छ ।

कोलकाता नाइट राइडर्स (केकेआर)ले शनिबार राति भएको खेलमा आरसीबीलाई उसैको मैदानमा ७ विकेटले पराजित गरेको हो ।

बेंग्लोरले दिएको १८३ रनको लक्ष्य कोलकाताले ३ विकेट गुमाएर १६.५ ओभरमै भेटायो ।

कोलकाताका वेन्कतेश ऐयरले सर्वाधिक ५०,  सुनिल नरेनले ४७ रन, फिल साल्टले ३०,  कप्तान श्रेयर ऐयरले अविजित ३९ रन र रिंकु सिंहले ५ रन बनाउँदै जित हासिल गरे ।

बेंग्लोरका यश दयाल, मंयक डगर र विजयकुमारले समान एक/एक विकेट लिए ।

पहिले ब्याटिङ गरेको बेंग्लोरले ६ विकेट गुमाएर पूरै २० ओभर खेल्दै १८२ रन बनाएको थियो । बेंग्लोरका लागि विराट कोहलीले उत्कृष्ट पारी खेल्दै ८३ रनको योगदान गरेका थिए । बेंग्लोरका  क्यामरुन ग्रिनले ३३, ग्लेन म्याक्सवेलले २८ र दिनेश कार्तिकले २० रन जोडेका थिए ।

कोलकाताका लागि हर्षित राना र आन्द्रे रसले दुई/दुई र सुनिल नरेनले एक विकेट लिए । महँगा खेलाडी मिचेल स्ट्राकले भने यो खेलमा पनि राम्रो गर्न सकेनन् ।

दुई खेलमा दुई खेल जितेको केकेआर अंकतालिकको दोस्रो स्थानमा छ भने तीन खेलमा दुई खेल हारेको बेंग्लोर अंकतालिकाको छैंटौं स्थानमा रहेको छ ।

आज राति लखनउ सुपर जायन्ट र पञ्जाब किंग्सबीच खेल हुँदैंछ ।