कांग्रेसको टिप्पणी : संसदीय छानबिनको माग छल्न अधिवेशन अन्त्यको सिफारिस भयो

३० चैत, काठमाडौं। प्रमुख प्रतिपक्षी नेपाली कांग्रेसले आफूहरुले संसदमा उठाउँदै आएका माग छल्न सरकारले संघीय संसदको हिउँदे अधिवेश नै अन्त्यका लागि राष्ट्रपतिसमक्ष सिफारिस गरेको टिप्पणी गरेको छ । शुक्रबार बसेको मन्त्रिपरिषदको बैठकले अधिवेशन अन्त्यका लागि राष्ट्रपति समक्ष सिफारिस गर्ने निर्णय गरेको छ ।

कांग्रेसकी सचेतक शुशिला थिङले सरकारले यस्तो यस्तो निर्णय लिनु अगाडि प्रमुख प्रतिपक्षी दलसँग पर्याप्त छलफल र परामर्श नगरेको बताइन् ।

उनले भनिन्, ‘चालू अधिवेशन अन्त्य गर्ने समय हुँदै थियो । वैशाख पहिलो सातासम्म चलाउन सकिन्थ्यो । तर, सरकारले संसदीय छानबिनको माग छल्न संसद अधिवेशन अन्त्यको सिफारिस गरेको हाम्रो बुझाइ छ ।’

कांग्रेसले सहकारीको रकम हिनामिनामा उपप्रधन तथा गृहमन्त्री रवि लामिछाने आरोपित रहेको बताउँदै आएको छ ।

यही चैत ६ गते बसेको प्रतिनिधि सभाको बैठकमा प्रधानमन्त्री पुष्पकमल दाहाल प्रचण्डले लामिछाने सहकारीको रकम अपचलनमा संलग्न नरहेको प्रहरी बृफिङ रहेको बताएका थिए ।

प्रधानमन्त्रीको जवाफप्रति चित्त नबुझाएको कांग्रेसले त्यसयता संसदीय छानबिन समिति गठनको माग राख्दै आएको छ । आफूहरुको माग सम्बोधन नभइ संसद अधिवेशन अन्त्य गरेर सरकारले समस्यालाई पन्छाउन खोजेको कांग्रेसले बताएको छ ।

अर्को अधिवेशनमा समेत यो विषय उठ्न सक्ने कांग्रेस सचेतक थिङको भनाइ छ । उनले भनिन्, ‘‘केही समयभित्रै सरकारले बजेट अधिवेशन बोलाउनैपर्छ बोलाउला । त्यो बेलासम्मको परिस्थिति के हुन्छ त्यस आधारमा कांग्रेसले आफ्नो व्यवहार प्रस्तुत गर्छ ।’