बेतौना-हरिपुर खानेपानी समस्या समाधानबारे अध्ययन गर्दै प्राविधिक टोली 

३० भदौ, सिरहा । सिरहाको गोलबजार नगरपालिका–१२ को बेतौना-हरिपुरमा देखिएको खानेपानी समस्या समाधानबारे अध्ययन गर्न प्राविधिक टोली खटिएको छ ।

स्थानीयले भोग्नु परेको खानेपानी समस्याबारे अध्ययन गर्न खानेपानी तथा ढल व्यवस्थापन कार्यालय जनकपुरधामबाट प्राविधिक टोली सोमबार हरिपुर पुगेको हो ।

हरिपुरका करिब २०० परिवार लामो समयदेखि एउटै सबमर्सिबल पम्पको भरमा खानेपानीको जोहो गर्दै आएका छन्।

अधिकांश घरका आँगनमा चापाकल भए पनि भूमिगत पानीको सतह घटेपछि चापाकलबाट पानी आउन छाडेको स्थानीयको गुनासो छ।

बेतौना-हरिपुरमा देखिएको खानेपानी समस्याबारे अनलाइनखबरले २५ भदौमा समाचार समेत प्रकाशित गरेको थियो ।

स्थलगत निरीक्षणपछि खानेपानी तथा ढल व्यवस्थापन कार्यालय जनकपुरधामले तत्काल खानेपानीको व्यवस्था गर्ने तयारी थालेको छ।

कार्यालयका प्रमुख मिहिरचन्द्र आचार्यका अनुसार गोलबजार–१२ को खानेपानी समस्याबारे समाचार प्रकाशित भएपछि मन्त्रालय र कार्यालयको ध्यानाकर्षण भएको हो।

‘हामी दिउँसो करिब १२ बजे समस्या रहेको स्थलमा पुग्यौँ। त्यहाँ खानेपानीको समस्या रहेछ। हामीले स्थलगत निरीक्षण पनि गर्‍यौँ,’ प्रमुख आचार्यले भने।

उनका अनुसार कार्यालयले बेतौना–हरिपुरमा चार इन्चको करिब १२० मिटर गहिरो बोरिङसहित ओभरहेड ट्यांकी निर्माण गर्ने तयारी गरेको छ। त्यससँगै स्थानीयलाई सहज रूपमा खानेपानी उपलब्ध गराउन करिब ५ देखि १० वटा धारासमेत निर्माण गरिने उनले बताए।

‘आवश्यकता हेरेर दोस्रो वा तेस्रो बोरिङसमेत गर्न सकिन्छ,’आचार्यले भने।

बोरिङ जडानका लागि आवश्यक जग्गा उपलब्ध हुनासाथ काम सुरु गरिने कार्यालयले जनाएको छ। उनका अनुसार मंगलबार बिहान वडा कार्यालयले स्थानीय जनप्रतिनिधि तथा सरोकारवालासहित बैठक राखेको छ।

‘वडा कार्यालयले बोरिङ जडानका लागि जग्गा उपलब्ध गराउनेबित्तिकै मन्त्रालयको निर्देशनअनुसार काम सुरु गर्छौँ,’ आचार्यले बताए।