कफी विथ करण ९ : अनन्या पाण्डेले गरिन् आफ्ना सबै पूर्वप्रेमीलाई फोन

करण जोहरको चर्चित शो ‘कफी विथ करण’ को नवौँ सिजनको आगामी भागमा अनन्या पाण्डे र अनन्या बिड्ला एकसाथ देखिने भएका छन् । कार्यक्रममा उनीहरूले करणका रमाइला प्रश्नको जवाफ दिनुका साथै एकअर्कासँग जोडिएका केही रहस्य पनि खोलेका छन् ।

शनिबार कार्यक्रम सञ्चालक करण जोहरले आगामी भागको प्रोमो सार्वजनिक गरेका थिए । प्रोमोमा दुवै अनन्या रमाइलो गर्दै एकअर्कासँग ठट्टा गरेको देख्न सकिन्छ।

प्रोमोमा अनन्या पाण्डेले आफूलाई आफ्नो जस्तै नाम भएका मानिस मन नपर्ने बताउँछिन् । तर अनन्या बिड्ला भने यसको अपवाद रहेको उनको भनाइ छ ।

कार्यक्रमको एउटा खण्डमा करणले पाहुनालाई आफ्ना सेलिब्रेटी साथीलाई फोन गरेर ‘हे करण, म बोल्दै छु’ भन्न लगाउँछन् । यस क्रममा अनन्या पाण्डेले आदित्य रोय कपुरलाई फोन गर्ने प्रयास गर्छिन् । तर फोन भने कार्तिक आर्यनले उठाउँछन् ।

यही क्रममा अनन्या बिड्लाले ठट्टा गर्दै अनन्या पाण्डेले आफ्ना सबै पूर्वप्रेमीलाई पालैपालो फोन गरिरहेको बताउँछिन् । उनको कुरा सुनेर करण जोहर हाँस्न थाल्छन्।

दुई अनन्यासँगै शनाया कपुर पनि

कार्यक्रममा शनाया कपुरको उपस्थितिले थप रमाइलो बनाएको छ । कार्यक्रममा उनीहरूलाई एउटा चुनौती दिइन्छ । बोर्डरुम र बेडरुम दुवै ठाउँमा मिल्ने एउटा वाक्य बनाउनुपर्ने हुन्छ ।

यस क्रममा शनाया र अनन्या दुवैले रणवीर सिंह आफ्नो मनपर्ने अभिनेता भएको खुलेर बताउँछन् ।

त्यस्तै, अनन्या बिड्लाले आफ्नो परिवारको एउटा फरक बानीबारे पनि खुलासा गर्छिन् । उनका अनुसार बिड्ला परिवारसँग जोडिएको एउटा कुरा उनीमा छैन । त्यो हो, आफूसँग पैसा राख्ने बानी । उनले कहिल्यै साथमा पैसा नराख्ने बताएकी छिन् ।

यो एपिसोड बुधबार साँझ ७ बजे जियोहटस्टारको ‘द पिकक हब’ मा प्रसारण हुनेछ ।

अनन्या पाण्डेका पूर्वप्रेमी को-को ?

यसअघि अनन्या पाण्डे अभिनेता ईशान खट्टरसँग प्रेम सम्बन्धमा थिइन् । पछि उनीहरू अलग भए । सन् २०२२ मा ईशानले ‘कफी विथ करण’ कार्यक्रममा आफ्नो ब्रेकअप भएको पुष्टि गरेका थिए । उनले भविष्यमा पनि आफूहरू साथी रहिरहने आशा व्यक्त गरेका थिए ।

त्यसपछि अनन्या करिब दुई वर्ष अभिनेता आदित्य रोय कपुरसँग प्रेम सम्बन्धमा रहेको खबर सार्वजनिक भएको थियो । उनीहरूले आफ्नो सम्बन्धलाई औपचारिक रूपमा सार्वजनिक नगरे पनि सँगै घुम्न गएका तस्बिर सामाजिक सञ्जालमा आएका थिए ।

यसैगरी फिल्म ‘तू मेरी मैं तेरा, मैं तेरा तू मेरी’ का सहअभिनेता कार्तिक आर्यनसँग पनि अनन्याको नाम जोडिएको थियो ।

अहिले अनन्या पूर्वमोडल वाकर ब्लान्कोसँग प्रेम सम्बन्धमा रहेको चर्चा छ । सन् २०२४ मा अनन्त अम्बानी र राधिका मर्चेन्टको विवाह समारोहमा उनीहरू पहिलोपटक सँगै देखिएका थिए ।

बम्बे टाइम्सको रिपोर्टअनुसार उक्त समारोहमा अनन्याले वाकरलाई आफ्नो प्रेमीका रूपमा अरूसँग परिचय गराएकी थिइन् ।

अनन्या पाण्डेको पछिल्लो फिल्म

अनन्या पछिल्लो समय रोमान्टिक ड्रामा फिल्म ‘चाँद मेरा दिल’ मा देखिएकी थिइन् । फिल्ममा उनीसँग लक्ष्य लालवानी मुख्य भूमिकामा थिए । करण जोहरको धर्मा प्रोडक्सनले निर्माण गरेको यो फिल्म मे ८ मा हलमा प्रदर्शन भएको थियो । तर बक्स अफिसमा फिल्मले अपेक्षाअनुसार सफलता पाउन सकेन ।

यसका साथै अनन्याको चर्चित सिरिज ‘कल मी बे’ को दोस्रो सिजन पनि आउने तयारीमा छ ।

को हुन् अनन्या बिड्ला ?

अनन्या बिड्ला आदित्य बिड्ला समूहका प्रमुख कुमार मंगलम बिड्लाकी छोरी हुन् । उनी सन् १९९४ मा मुम्बईमा जन्मिएकी हुन् । उनले अमेरिकन स्कुल अफ बम्बे र बेलायतको अक्सफोर्ड विश्वविद्यालयमा अध्ययन गरेकी छन् ।

धनी परिवारमा जन्मिए पनि अनन्याले उद्यमी र लगानीकर्ताका रूपमा आफ्नो छुट्टै पहिचान बनाएकी छन् । उनी व्यवसायसँगै संगीत क्षेत्रमा पनि सक्रिय रहेकी छन्।

आरसीबीको स्वामित्व वा व्यवस्थापनसँग अनन्या बिड्लाको प्रत्यक्ष सम्बन्ध भने छैन ।