सिन्धुली महोत्सवमा हजारौं दर्शकमाझ गुञ्जियो ‘प्रमोद एण्ड परम्परा’

काठमाडौं । गायक प्रमोद खरेल र उनको सांगीतिक समूह ‘प्रमोद एण्ड परम्परा’ अहिले देशब्यापी टूरमा ब्यस्त छ । यो मेसोमा ब्याण्ड आइतबार ‘सिन्धुली महोत्सव २०८२’ मा गुञ्जियो ।

सिन्धुली उद्योग वाणिज्य संघद्वारा आयोजित महोत्सवमा खरेलले हजारौं दर्शकमाझ प्रस्तुति दिए । महोत्सवका सांस्कृतिक संयोजक रामभक्त श्रेष्ठका अनुसार १५ हजार भन्दा धेरै दर्शकसामु ब्याण्डले प्रस्तुति दिएको थियो ।

गायक खरेलले पनि हजारौं दर्शकमाझ गुञ्जिन पाउँदा खुसी लागेको बताए । ‘न कुनै शुक्रबार, न कुनै शनिबार । न कुनै बिदा । १५ हजारभन्दा धेरै दर्शकसामु हामी गुञ्जियौं’ खरेलले अनलाइनखबरसँग भने ।

‘खचाखच दर्शकले अन्तिम सम्म पनि उत्तिकै साथ दिनुभयो । मोबाइलको लाइटले सिन्धुलीको कन्सर्ट मैदान पूरै भरिएको थियो । गेटबाट निस्कने दर्शकको भीडले बाटोमा पनि ट्राफिक जाम भयो’ कन्सर्ट माहोलबारे प्रमोदले भने ।

ब्याण्डले २२ माघमा भोजपुुरको पौवादुंगा, २५ माघमा स्याङ्जाको वालिङ र ६ फागुनमा उदयपुरको गाईघाटमा प्रस्तुति दिने कार्यक्रम छ ।

आसन्न प्रतिनिधिसभा चुनावलाई दृष्टिगत गर्दै ब्याण्डको यसवर्षको अन्तिम कन्सर्ट गाइघाटमा हुने ब्याण्डको व्यवस्थापक औद्योगिक शान्ति नेपालले जनाएको छ ।

किबोर्डमा राहुल भुजेल, ड्रममा भुपेन्द्र रसाइली, गिटारमा देवासिस तामाङ, बास गिटारमा कुशल थापामगर, बाँसुरीमा सन्जीव मैनाली र मादलमा जेपी जोशी छन् ।