१० भदौ, काठमाडौं । कीर्तिपुर नगरपालिकाले हाफ पाइन्ट लगाएर मेयर र उपमेयरलाई भेट्न रोक लगाएको छ ।
नगरपालिकाले सूचना नै निकालेर शिष्ट र मर्यादित पोशाकमा भेट्ट आउन भनेको छ । ‘हाफ पाइन्ट लगायतका भड्किलो पोशाकमा भेट्न नआउनु हुन’ भनिएको छ ।
भेटघाटलाई शिष्ट बनाउन औपचारिक पोशाकमा आउन आग्रह गरिएको मेयर रमेश महर्जनले बताए । ‘हाफ पाइन्ट पनि अब के भन्ने … साह्रै अनौपचारिक ड्रेसमा आउन थालेपछि सूचना निकालेका हौं’ उनले भने, ‘यो सूचनापछि हिजो हाफ पाइन्ट लगाएर आउनेहरु पनि फुल पाइन्टमा आउन थाल्नु भएको छ ।’
के लगाउँदा भड्किलो पोशाक मान्ने भन्ने प्रश्नमा महर्जनले प्रष्ट जवाफ दिएनन् ।
आफूहरुले भेटघाटलाई शिष्ट मात्र बनाउन खोजेको र कीर्तिपुरबासी खुसी रहेको बताए । यसलाई लिएर सामाजिक सञ्जालमा मात्र हंगामा भएको उनको तर्क छ ।
