डिम्याट खाता

बीओआईडी (BOID) भनेको हितग्राही/लाभग्राही वा धितोपत्र धनीलाई चिनाउने संकेत नम्बर हो । डिजिटल सिस्टममा चलेको शेयर बजारमा लगानीकर्तालाई चिन्न एक प्रकारको कोड चाहिन्छ ।

तपाईको १६ अंकको डिम्याट खाता नै बीओआईडी (लाभग्राही पहिचान नम्बर) हो । डिम्याट खाता खोल्ने ग्राहकलाई खाताको सबै जानकारी र बीओआईडी सहितको इमेल पठाइन्छ । बीओआईडीको अघिल्लो ८ अंकले डीपीलाई चिनाउँछ भने पछिल्लो ८ अंकले ग्राहक (हितग्राही) लाई चिनिन्छ ।

उदाहरणका लागि, DP ID 13-013700 छ र  Client ID 01504686  हो भने यसबाट BOID 1301370001504686 हुनेछ । यसमा अगाडिको 130 ले डिम्याटको केन्द्रीय निक्षेप निकाय अर्थात् सीडीएससीलाई प्रतिनिधित्व गर्छ । त्यसपछिको ५ अंकको कोड १३७०० ले डीपीलाई चिनाउँदछ भने बाँकी ८ डिजिटको अंकले कुन ग्राहकको डिम्याट खाता हो भनेर चिनाउँदछ ।

डिम्याट खाता कसरी खोल्ने ? यो लिंकमा क्लिक गर्नुहोस् ।

DPID कसरी पत्ता लगाउने ?
डिम्याट खाता खोल्ने सम्पूर्ण निक्षेप सदस्यहरूको आफ्नो–आफ्नो DPID रहेको हुन्छ । CDSC को वेबसाइटमा रहेको ‘मेरो शेयर’मा Depository Participants  (डिपोजिटरी पार्टिसिपेन्ट) मा आउने लिष्ट हेरेर कम्पनीको नामपछिको ५ डिजिटको अंकबाट DPID पत्ता लगाउन सकिन्छ ।

BOID कसरी पत्ता लगाउने ?
सबै लगानीकर्ताहरूलाई आफ्नो BOID थाहा हुनुपर्दछ । यदि कुनै कारणबाट आफ्नो डीपी आईडी याद नभएको खण्डमा आफ्नो डीपीमा फोन गरेर BOID थाहा पाउन सकिन्छ । यसबाहेक यदि तपाईलाई आफ्नो मेरो शेयर लगइन थाहा छ भने तपाईले मेरो शेयरमा लगइन गरेर पनि BOID थाहा पाउन सक्नुहुनेछ ।

१. ‘मेरो शेयर’ लगइन गर्नुहोस् ।

२. लगइन भइसकेपछि मेनु बारको माई डिटेल्समा थिच्नुहोस् । त्यहाँ तपाईको बीओआईडी देखिन्छ ।