श्रीधर पौडेल/अनलाइनखबर
पोखरा सहरबाट सहजै देख्न सकिन्छ माछापुच्छे हिमाल । दिनहुँ घरबाटै माछापुच्छ्रे हेरेकै हो । तर, आँखै अगाडि माछापुच्छ्रे हिमाल हेर्ने साइत मिलेको थिएन । माघको पहिलो साता यस्तो साइत जुराइदियो फिस्टेल अल्ट्रा फ्लाइटले ।
पोखरामा व्यवसायिक अल्ट्रा फ्लाइट गराइरहेको फिस्टेललेे विदेशी मात्र नभएर स्वदेशी पर्यटकको पनि उल्लेखनीयरुपमा उडान गरिरहेको छ । ‘प्लेनको बच्चो’जस्तै देखिने सानो अल्ट्रा फ्लाइटमा उढ्दा चरो बनेर उढेजस्तै प्रतीत हुँदोरहेछ ।
अल्ट्रा फ्लाइटको समय १५, ३०, ६० र ९० मिनेट भएकोमा विशेष गरी विदेशीले ३० र ६० मिनेटको उडान गर्ने गरेको फिस्टेल अल्ट्रा फ्लाइटका अपरेशन म्यानेजर दिनेश भण्डारी बताउँछन् । उनी नेपालीहरु विशेषतः ३० मिनेटको समय छनौट गर्ने गरेको बताउँछन् ।
अल्ट्रा फ्लाइटमा १५ मिनेटको समयमा पोखरा उपत्यका, सराङ्गकोट, बौद्ध स्तुपा र फेवातालको अवलोकन गराइन्छ भने ३० मिनेटको समयमा माछापुच्छे्र हिमाल नजिकैसम्म लाने गरिन्छ ।
मनास्लु, धौलागिरी, अन्नपूर्ण र माछापुच्छ्रे हिमालको फेदीसम्म उडान गर्न चाहनेका लागि ६० र ९० मिनेटको समय उपयुक्त हुन्छ ।
नेपाली पर्यटकका लागि १५, ३०, ६० र ९० मिनेटका लागि क्रमशः ६ हजार ५ सय, ११ हृजार ५ सय, १९ हजार र २८ हजार रुपैयाँ रहेको छ भने विदेशीका लागि ७०, १२५ , १९८ र २८५ युरो लिने गरेको अपरेशन म्यानेजर भण्डारी बताउँछन् ।
पदयात्रामा जान नसक्ने तर हिमाललाई नजिकै बाट नियाल्न रुचि गर्नेहरुका लागि यो सबैभन्दा उपयुक्त माध्यम रहेको छ अल्ट्रा फ्लाइट ।
सबैभन्दा पछिल्लो प्रविधिमा युकेमा निर्माण गरिएका अल्ट्रालाईटद्वारा उडान गरिरहेको फिस्टेल अल्ट्रा फ्लाइटका अपरेशन म्यानेजर भण्डारी बताउँछन् ।
यो प्रविधिबाट निर्माण गरिएका अल्ट्रामा फ्लाइलट र प्यासेन्जरलाई एक आपसमा कुराकानी गर्न तथा बस्तुस्थितिबारे जानकारी दिन सजिलो हुने गरेको म्यानेजर भण्डारी बताउँछन् ।
अल्ट्रा गर्दा कैद गरिएका तस्वीर तथा भिडियो लिन चाहेमा नेपालीका लागि १ हजार ५ सय र विदेशीका लागि २५ डलर लाग्ने गरेको म्यानेजरको भनाइ छ ।
