हाँस्य टेलिश्रृङखला ‘तीतो सत्य’ वाट चर्चामा आएका हुन् निर्मल शर्मा । चलचित्र निर्माता समेत रहेका शर्मा ‘तीतो सत्य’ बन्नु अघि पनि अभिनयमा सक्रिय थिए । तर, चर्चामा ल्यायो ‘तीतो सत्य’ले ।
चलचित्र, सिरियल र विज्ञापनमा अभिनय गरेका शर्मा पछिल्लो समय निर्देशनमा सक्रिय छन् । ‘चकलेट र ब्रासलेट’ दुई चलचित्रको सुटिङ सकाइएका निर्मल अहिले नयाँ चलचित्रको लेखनमा ब्यस्त छन् । प्रस्तुत छ निर्मलका ‘पाँच गोग्य कुरा’ उनको आफ्नै शब्दमा :
१. मलाई बैठक कोठाको काम अरुले गरेको चित्तै बुझ्दैन । तन्ना, सोफा र पर्दाहरु मिलाउने काम म आफैं गर्छु । आफु बस्ने र आफु वरिपरिको ठाउँ शुद्ध राख्नुपर्छ भन्ने सानैदेखि परेको थियो । त्यसकारण म फुर्सदको बेला घर पनि आफैं पुच्छु ।
२. म प्राय खाट वा पलङमा सुत्दिन । मलाई पलङमा भन्दा भुईमा सुत्दा बढी आनन्द आउछ । भुईमा सुत्दा शरीरले पनि बढी आराम पाउछ । भुइमा सुत्दा जिउ पुरै तन्किए जस्तो लाग्छ ।
३. हरेक विहान तरकारी र दुध किन्ने ठेक्का मेरो आफ्नै हो । मलाई कुनै पनि खाने कुरा नमिठो लाग्दैन । तर, म श्रीमती र बाबुहरुको रोजाई अनुसारको तरकारी किन्छु ।
४. दुई वर्ष लगाएर ११ किलो घटाँए । अहिले ९६ किलोको छु, अझै ७ किलो घटाउने योजनामा छु । दुई वर्ष भयो जेरी, स्वारी, लालमोहन, पेडा खाएको छैन । रातो मासु खान छाडें । तेलको अभाव वा अरु कुनै खालको अवरोध हुँदा माक्स लगाएर पब्लिक गाडीमा हिड्ने गरेको छु । अहिले पनि माक्स लगाएर पब्लिक गाडिमै हिडिरहेको छु ।
५ मेरा साथीभाईले खाजा खाएको तिर्ने र सापटी लगेको पैसा फर्काउने हो भने मेरो हातमा २५ लाख रुपैंया जम्मा हुन्छ । मेरो बुझाईमा ८ लाख रुपैया नउठ्ने पक्का छ । खाजा खाएर पैसा नतिर्नेहरु मध्ये कतिले त देशै छाडीसके ।
