जेसन राफटिस फ्लोरियामा एक कार डिलरसिपमा सेल्स म्याजेनर थिए । उनले आफ्नो विभागमा एक पुरानो साथीलाई जागिर दिने निर्णय गरे ।
तर, उनलाई छिटै आफ्नो गल्ती महसुस भयो । उनका साथी अन्य कर्मचारीको उपस्थितिमै कलेज दिनका कुराकानी गर्थे । तर, यो त केवल सुरुवात मात्र थियो ।
राफटिस भन्छन्, ‘यो मेरा लागि एक नराम्रो सपनाजस्तै थियो । साथी भएकै कारण उनी आफूखुसी काममा आउन थाले । उनले यति धेरै छुट्टी लिए कि, त्यति अन्य कर्मचारीले कहिल्यै लिएका थिएनन् ।’
अन्तिममा राफटिसले आफ्नो साथीलाई हटाउने निर्णय गरे । र, उनी सल्लाह दिन्छन्, ‘नचिनेका मानिसलाई मौका दिनुस् । उनीहरूलाई सम्हाल्न सजिलो हुन्छ र जागिरबाट निकाल्न पनि ।’
चाहे तपाईं बोसको रूपमा होस् वा चाहे कर्मचारीको रूपमा, दुवै भूमिकामा काम र मित्रतालाई एकापसमा जोड्दा घाटा लाग्ने सम्भावना हुन्छ ।
चाहे आफ्नो साथीलाई जागिर दिने निर्णय होस् वा साथी कहाँ काम गर्ने निर्णय । तपाईंले हरेक सम्भावनाबारे सोच्नुपर्छ ।
जागिर दिने एक गलत निर्णयले तपाईंको प्रतिष्ठामै असर गर्न र प्रश्न उठाउन सक्छ । मित्रता त टुट्छ नै, पर्सनालिटीमा परिवर्तन आउँछ र हरेक परिवर्तन राम्रोका लागि नै हुन्छ भन्ने पनि छैन ।
डालसस्थित लिडरसिप कसल्टेन्सी द पर्फेक्ट फिटका संस्थापक न्यान्सी किन इमेलमार्फत भन्छन्, ‘जब तपाईंको साथी निकै प्रतिस्पर्धी हुन्छ वा तपाईंले भन्दा राम्रो काम गर्न चाहन्छ, समस्या भइहाल्छ । यद्यपि सबै त्यो अवस्थासम्म पुग्दैनन् ।’
उनका अनुसार साथीलाई मद्दत गर्न चाहँदा तपाईं आफैं अप्ठेयारोमा पर्न सक्नुहुन्छ । यदि तपाईं आफ्नो साथीलाई सहयोग गर्न र मित्रता पनि कायम राख्न चाहनुहुन्छ भने उनको रिफरेन्स आफ्नो कार्यालयको एचआर विभागमा पठाउनुस् । यदि तपाईंको साथी अन्तर्वार्तामा आएनन् वा पास भएनन् भने छनोट हुनेछैन । तर, इपाईंले आफ्नो साथीलाई सहयोग त गर्नुभएको हुन्छ । नियुक्त गर्नु हुन्न । र, साथी पनि रिसाउनेछैन । यदि तपाईंको साथीले जागिर सुरु गरे र पछि राम्रो काम गरेनन् भने यसमा तपाईर्ंको कुनै दोष पनि हुन्न ।
यद्यपि साथीहरूलाई जागिर लगाइदिनु सधैँ गल्ती पनि हुुँदैन । यदि तपाईं पहिले पनि सहकर्मी रहेको र पछि अलग-अलग कम्पनीमा काम गरेको अवस्था हो भने फेरि एकै ठाउँमा काम गर्न सकिन्छ ।
यसमा फाइदा र घाटा दुवै हुन सक्छ । यदि कुनै साथीले तपाईंलाई नियुक्त गर्छ भने तपाईंले यो अवसरलाई तटस्थ भावले हेर्नुस् । तपाईंको साथी त्यहाँ काम गर्छ भन्ने बिर्सनुस् र राम्रो जागिर छ कि छैन हेर्नुस् । उदाहरणका लागि तपाईंको तलब कति हुनेछ ? के-के सुविधा दिइनेछ ? पदोन्नतिको अवसरका साथै जागिर कति चुनौतीपूर्ण छ ? साथै यो पनि ख्याल गर्नुस् कि तपाईं आफ्नो साथीलाई कति चिन्नुहुन्छ ? तपाईंको काममा साथीले कति विश्वास गर्छ ? यदि सँगै काम गर्न पाइएन भने के हुन्छ ?
बेलायतको बर्मिंघमस्थित वर्क लाइफ ब्यालेन्स कोच अनिता फिकरडेन भन्छिन्, ‘यदि तपाईं आफ्नो साथीसँग काम गर्न चाहनुहुन्छ भने यी प्रश्न आफूले आफैंलाई सोध्नुपर्छ ।’
बीबीसी हिन्दीबाट साभार
