२४ वैशाख, काठमाडौं । आज माता तिर्थ औंसी अर्थात् आमाको मुख हेर्ने दिन, आफूलाई जन्म दिने ममतामयी आमाको सम्झना र सम्मान गरी मनाइँदैछ ।
जीवित वा दिवंगत दुवै आमाको तृप्तिका लागि आजको दिनलाई पुण्य पर्व मानिन्छ ।
आमा हुनेहरूले आजका दिन मीठा मीठा परिकार खुवाउने र बस्त्र लगायतका उपहार दिइ आशिर्वाद लिने गर्दछन् । दिवंगत आमाको सम्झनामा तर्पण, पिण्ड दान र श्राद्ध गरी सम्झना पनि गरिन्छ ।
वैशाख कृष्ण औंसी अर्थात् माता तिर्थ औंसीको दिन मातृश्राद्ध गरे पुण्य प्राप्त भई आमाले तृप्ति पाउने शास्त्रमा उल्लेख छ । शास्त्रमा बाबुभन्दा आमा दश गुणा बढी मान्य हुन्छिन् भनी व्याख्या गरिएको छ ।
माता तिर्थ औंसीको दिन काठमाडौंको पश्चिमी भेगमा रहेको मातातीर्थमा मेला लागेको छ । मातातिर्थमा रहेको कुण्डमा नुहाउने र आमाको सम्झनामा श्राद्ध गर्ने भक्तजनको घुइँचो लागेको छ ।
तस्वीर: विकास श्रेष्ठ/अनलाइनखबर
