१५ माघ, विराटनगर । नेकपा एमाले संसदीय दलका उपनेता सुवासचन्द्र नेम्वाङले सरकार निर्वाचन नगर्ने खेलमा लागेको आरोप लगाएका छन् ।
निर्वाचनको मिति घोषणा गरे संविधान संशोधनका विषयमा छलफल गरेर अघि बढ्न सकिने भन्दै नेम्वाङले सरकारलाई छिटो निर्वाचन मिति घोषणा गर्न आग्रह गरेका छन् ।
शनिबार विराटनगरमा संचारकर्मीसँगको भेटमा नेम्वाङले निर्वाचनसम्बन्धी विधेयक संसदमा पेस गर्न सरकारले आलटाल गरिरहेको आरोप लगाए । संसदबाट निर्वाचनसम्बन्धी दुईवटा विधेयक पारित भए पनि अझै चारवटा विधेयक पारित हुन बाँकी हुनुले सरकार निर्वाचनबाट भाग्न खोजेको प्रष्ट हुने बताए ।
निर्वाचन मिति घोषणा भएपछि पनि निर्वाचनसम्बन्धी विधेयक पारित गर्न सकिने उनको तर्क छ ।
विराटनगरमा एमालेले आयोजना गरेको एक कार्यक्रममा सहभागी हुन नेम्वाङ यहाा आएका हुन् ।
