सकेसम्म अधिकतम सहमतिको संविधान : मन्त्री सिंह

११ असार, पाल्पा । उपप्रधान एवम् संघीय मामिला तथा स्थानीय विकास मन्त्री प्रकाशमान सिंहले सकेसम्म अधिकतम् सहमतिको संविधान जारी गरिने बताएका छन् ।

पाल्पाको तानसेनमा बुधवार संग्रहालयको उद्घाटन गर्दै उनले भने,’सकेसम्म अधिकतम् सहमतिमा संविधान जारी गर्ने प्रयास हुन्छ । त्यसका लागि सरकारले समन्वयकारी भूमिका निर्बाह गर्छ । यदि सहमति हुन सकेन भने प्रक्रियागत रुपबाट संविधान जारी गर्छौर् ।’ उनले विधि र प्रक्रियालाई कसैले पनि अस्विकार गर्न नहुने बताए ।

मन्त्री सिंहले संविधान निर्माणको कार्यतालिका अनुसार नै संविधानसभाले काम गरिरहेको र माघ ८ भित्रै नयाँ संविधान जारी हुनेसमेत बताए । उनले जनताको अपेक्षा विकाससँग जोडएकाले सरकारले विकास निर्माणका कामलाई प्राथमिकतामा राखेको वताए ।

उनले राजनीतिक संक्रमणकालको अन्त्य गर्न नसके मुलुक संकटमा फस्ने वताए । उनले राजनीतिक संकट अन्त्य गरी मुलुकलाई समृद्धिको बोटमा लैजान सवै दल मिलेर अघि बढ्नु पर्ने वताए ।

मन्त्री सिंहले आफ्नो पार्टी कांग्रेस मुलुकमा जारी राजनीतिक संकटको अन्त्य गरी समृद्धिको बाटोमा लैजान सवै दललाई सहमतिमा ल्याएर सहकार्य गरेर अघि वढ्न तयार रहेको वताए ।