१ साउन, काठमाडौं । द ब्रिटिस कलेजका विद्यार्थीहरुले काठमाडौँमा रगत अभाव बढेको समाचार सार्वजनिक भएपछि कलेज परिसरमा रक्तदान कार्यक्रम आयोजना गरेका छन् । सामाजिक उत्तरदायित्व अन्तर्गत कलेजमा स्थापना गरिएको विद्यार्थीहरुको क्लब हातेमालो फाउण्डेशनमा ६६ जना विद्यार्थीले रक्तदान गरेका थिए ।
हातेमालो फाउण्डेशनका संस्थापक तथा संयोजक सफलता श्रेष्ठ र कार्यक्रममा संयोजक रोशन मेहताको नेतृत्वमा रक्तदान कार्यक्रम आयोजना गरिएको थियो । कार्यक्रममा ब्रिटिस कलेजमा अध्ययनरत विद्यार्थीहरु र अन्य रक्तदाताहरुले रक्तदान गरेका थिए ।
कलेजभित्र सामाजिक र परोपकारका क्षेत्रमा काम गर्नका लागि अतिरिक्त क्रियाकलाप अन्तर्गत गठन भएको यस फाउण्डेशनले सामाजिक उत्तरदायित्य स्वरुप सो कार्यक्रम आयोजन गरिएको थियो । संस्थाले आगामी दिनहरुमा पनि रगतको चरम अभावका बेलामा पनि यस्ता अन्य कार्यक्रम गर्न तत्पर रहने जनाएको छ ।
रक्तदान कार्यक्रममा कलेजका शैक्षिक निर्देशक नरेन्द्र कडेंलले विद्यार्थीहरुले विशुद्ध शैक्षिक ज्ञानमात्र नलिई सामाजिक उत्तरदायित्व समेत बोक्नुपर्ने बताए । “विद्यार्थीहरुले पढाइका साथसाथै सामाजिक र परोपकारी कामहरुमा पनि आफूलाई क्रियाशील गराउँदै लैजानुपर्छ,” उनले भने, “त्यसका लागि कलेजले पनि सहयोगी भूमिका खेलिरहेको छ ।”
त्यसैगरी फाउण्डेशनका संयोजक सफलता श्रेष्ठले आफूहरुले सदैव अध्ययनका साथै सामाजिक उत्तरदायित्व वहन गर्ने गरी समाजलाई आवश्यक पर्ने हरेक गतिविधिमा सक्रिय भई लागिपर्ने बताइन् ।
प्रतिक्रिया 4