२० किलो चाँदीसहित एकजना पक्राउ

११ कात्तिक, रौतहट । जिल्ला प्रहरी कार्यालय रौतहटले २० किलो चाँदीसहित एक जनालाई सोमबार  पक्राउ गरेको छ ।
सदरमुकाम गौरस्थित कबिरचौकबाट सो परिमाणको चाँदीसहित गरुडाबैरिया-६ का १६ वर्षीय राजन झालाई पक्राउ गरिएको प्रहरी निरीक्षक रामप्रकाश चौधरीले जानकारी दिए ।
काठमाडाैंबाट ल्याइएको चाँदी तस्करीको माध्यमले भारततर्फ लैजान लागेको विशेष सूचनाका आधारमा जिल्ला प्रहरी कार्यालयबाट खटिएको टोलीले झाको झोला खानतलासी गर्दा उक्त चाँदी बरामद भएको प्रहरीले जनाएको छ ।
बरामद गरिएको चाँदी तथा अभियुक्तलाई आवश्यक कारबाहीका लागि राजस्व अनुसन्धान कार्यालय पथलैया बारामा बुझाउने तयारी भइरहेको छ । बरामद चाँदीको बजार मूल्य २० लाख रुपैयाँभन्दा बढी पर्दछ ।