१८ कात्तिक, काठमाडौं । गैर आवासीय नेपाली संघ मकाउले प्रधानमन्त्री राहत कोषमा २ लाख २० हजार २ सय रुपैयाँ सहयोग गरेको छ ।
मंगलबार विहान प्रधानमन्त्री निवास बालुवाटारमा आयोजित कार्यक्रममा गैरआवासीय नेपाली संघ मकाउका अध्यक्ष सुदर्शन थापा मगरले प्रधानमन्त्री सुशील कोइरालालाई रकम हस्तान्तरण गरेका हुन् ।
चेकमार्फत् सहयोग रकम ग्रहण गर्दै प्रधानमन्त्री कोइरालाले मुलुकमा विपत्ति आउदा स्वदेश र विदेशमा रहेका नेपालीहरुले गच्छे अनुसार सहयोग गरेर राम्रो उदाहरण प्रस्तुत गरेको बताए ।
सहयोग रकम दुरुपयोग हुन नदिने र वास्तविक बाढी पहिरो पीडितहरु समक्ष पुर्याउने कोइरालाले प्रतिबद्धता जनाए । अघिल्ला बर्ष राहत दुरुपयोग भए पनि यसपटक दुरुपयोग नभएको उनले दावी समेत गरे ।