निमुसंगम घर्ती
२४ कात्तिक, घोराही । एकीकृत नेकपा माओवादीका अध्यक्ष पुष्पकमल दाहाल प्रचण्डले पहिचानसहितको संघीयता नभए आमहडताल थाल्ने चेतावनी दिएका छन् ।
जनयुद्धको आधार इलाका रोल्पा जाने क्रममा सोमबार दाङको घोराहीमा पत्रकारहरुसँग कुरा गर्दै प्रचण्डले नयाँ बन्ने संविधानमा पहिचानको आधारमा राज्य पुनःसंरचना नभए २२ दलिय मोर्चासहितका पहिचानवादी शक्तिले देशभर आमहडताल गर्ने बताए ।
सहमतिबाटै संविधान निर्माण होस् भन्ने पक्षमा रहेको भन्दै उनले कांग्रेस र एमालेले बलजफ्ती गर्न खोजे स्थिति गम्भीर हुने बताए । कांग्रेस र एमालेले ल्याएको प्रस्तावमा पहिचान झिकिएको भन्दै उनले भौगोलिक विभाजन मात्रै गरिएको प्रस्ताव अस्वीकार्य भएको बताए ।
एमाओवादी अध्यक्ष प्रचण्डले कांग्रेस र एमालेले सहमतिको बाताबरणलाई बिथोलेको आरोप लगाए । उच्चस्तरीय राजनितिक समितिको बैठकमा आउँदैनौं भनेर कांग्रेस एमालेले भन्नु गलत भएको उनको टिप्पणी थियो ।
पत्रकार सम्मेलन अघि अध्यक्ष प्रचण्डले कार्यकर्ताहरु सँग समेत भेटघाट र छलफल गरेका थिए । नेताहरु ५ दिनका लागि रोल्पा गएका छन् ।
प्रचण्डसहितका नेताहरु जनयुद्धको पहिलो पल्ट आक्रमण गरेको होलेरी बास बस्ने छन् । प्रचण्डले रोल्पामा कार्यकर्ता, शहिद परिवार, घाइते, अपाङगसँग भेटघाट गर्ने कार्यक्रम छ ।
अध्यक्ष प्रचण्ड सहित महासचिब कृष्णबहादुर महरा, सचिब बर्षमान पुन र नेता नन्दकिशोर पुन छन् ।
प्रतिक्रिया 4