१५ मसिर, काठमाडौं । विशेष अदालतले राजस्व हिनामिना गरेका आरोपमा नेपाल टेलिकम विराटनगर शाखका सहायक प्रशासकीय अधिकृत प्रदीपकुमार नकर्मीलाई दोषी ठहर गरेको छ ।
अदालतले नकर्मीलाई ८ वर्ष जेल सजाय सुनाएको छ भने एक करोड ८४ लाख ५० हजार ०६८ जरिवाना भराउन भनेको छ ।
अदालतका अध्यक्ष मोहनरमण भट्टराई तथा सदस्यद्वय भूपेन्द्रप्रसाद राई र नरेन्द्रकुमार शिवाकोटीको इजलासले नगद शाखा (क्यास फाँट)मा कार्यरत सहायक अधिकृत नकर्मीले राजस्व जम्मा भएको रकम टेलिकमको नाममा बैंक दाखिला नगरी हिनामिना गरेको ठहर गरेको हो ।
अर्का सहायक कर्मचारी इमु श्रेष्ठ -नकर्मी)ले भने सफाइ पाएका छन् । सहायक अधिकृत नकर्मीले यसअघि ३९ लाख ३७ हजार रकम बुझाइसकेकाले बिगो बराबरको बाँकी एक करोड ४५ लाख १३ हजार ०६८ भराउनुपर्ने ठहर गरिएको छ ।
राजस्व दाखिला गर्नुपर्ने रकम हिनामिना गरेको आरोपमा अख्तियार दुरुपयोग अनुसन्धान आयोगले २०६९ असोज ४ मा मुद्दा दायर गरेको थियो । रासस
प्रतिक्रिया 4