२ माघ, काठमाडौं । संविधानसभाका अध्यक्ष सुवास नेम्वाङले शनिबार पनि संविधानसभाको बैठक आह्वान गरेका छन् । एमाओवादीसहित विपक्षी मोर्चाले शनिबार बैठक नराख्न दबाव दिएका छन् ।
माघ ८ नजिक आइसकेकाले जनतालाई सभासदहरु शनिवार पनि संविधान निर्माणकै काममा छन् भनेर आश्वस्त पार्नका लागि बैठक बोलाइएको सभाध्यक्ष नेम्वाङले बताए ।
यसअघि कांग्रेस एमालेले शनिबार पनि बैठक राखेर संवाद समितिको प्रतिवेदनमाथि छलफल सिध्याउन नेम्वाङलाई दबाव दिएका थिए भने एमाओवादीसहितका विपक्षी दलले शनिबार बैठक नराख्न दबाब दिएका थिए ।
मधेसी मोर्चाका नेता ओलीसँगै बसे
यसैवीच एमाले अध्यक्ष केपी शर्मा ओलीले माफी नमागेसम्म एमालेसँगको बैठकमा सहभागी नहुने भीष्म प्रतिज्ञाबाट मधेसवादी दलका नेताहरुपछि हटेका छन् ।
ओलीले बाचुञ्जेल माफी नमाग्ने बरु मधेस जाने प्रतिक्रिया दिएपछि लामो समयदेखि दलहरुबीच सम्वाद हुन नसकेका बेला शुक्रवार संविधानसभा अध्यक्षको पहलमा चार दलका शीर्षनेता सँगै बसेका हुन् ।
संविधानसभा भवनको शंकर हलमा बसेको चारपक्षीय शीर्ष बैठकमा एमाले अध्यक्ष ओली र फोरम अध्यक्ष उपेन्द्र यादव नजिक-नजिक बसेका थिए । त्यो बैठकमा फोरम लोकतान्त्रिकका अध्यक्ष विजय गच्छदार पनि सहभागी थिए ।
शीर्ष नेताहरुबीच संवादहीनताको अवस्था भंग भएर सकारात्मक वार्ता शुरु भएको अध्यक्ष नेम्वाङले बताए । दलहरुबीच असहमतिका धेरै विषय नभए पनि अविश्व्ाासका कारण विवाद चुलिएको उनले बताए ।
शीर्षनेताहरुले शनिबार बिहान ८ बजे पुनः संविधानसभा अध्यक्षकै उपस्थितिमा बानेश्वरमै वार्ता गर्ने सहमति जनाएका छन् । निर्वाचन प्रणाली र न्याय प्रणालीमा सहमति भइसकेको अवस्थामा शासकीय स्वरुप र संघीयतामा पनि ठूलो विवाद नभएको उनले बताए ।
नेम्वाङले दलका नेताहरुलाई माघ ८ अघि कुनै न कुनै सहमति वा प्रक्रिया शुरु गर्ने गरी सहमति जुटाएर जनतालाई सकारात्मक सन्देश दिन आग्रह गरेका छन् ।
प्रतिक्रिया 4