८ माघ, काठमाडौं । एकीकृत नेकपा माओवादीका अध्यक्ष पुष्पकमल दाहाल प्रचण्डले प्रतिगामी संविधान रोक्न आफूहरु सफल भएको बताएका छन् ।
माघ ८ गते रातिको संविधानसभाको बैठक पनि अवरुद्ध भएपछि सञ्चारकर्मीसँग कुरा गर्दै प्रचण्डले भने-‘सत्तामा रहेका पार्टीहरुले प्रतिगामी प्रकृतिको संविधान दिन दुस्साहस गरेका थिए, त्यसलाई हामीले सफल हुन दिएनौं ।’
यथास्थितिवादी, प्रतिक्रियावादी संविधान बन्न नदिएकोमा आफूलाई गर्व लागेको प्रचण्डले बताए ।
एमाओवादी अध्यक्ष प्रचण्डले विहीबार पनि हुनै लागेको सहमति कांग्रेस र एमालेले तोडेको आरोप लगाए । उनले भने-‘भएका सहमतिलाई सहमति भयो भनौं, संघीयतामा सहमति कायम गर्ने प्रयत्न जारी राखेर २ वा ३ हप्तामा सहमति गर्छौं भनौं भनेर प्रयत्न गरौं तर, कांग्रेस र एमालेमा बहुमतको दम्भ देखियो, उहाँहरु तयार हुनुभएन ।’
यद्यपि प्रचण्डले सहमति र सम्वादबाट निकास खोज्ने प्रयत्न जारी राख्ने बताए ।
एमाओवादी अध्यक्ष प्रचण्डले माघ ८ मा संविधान दिने आफूहरुको पनि प्रतिवद्धता भएको भन्दै त्यो पूरा गर्न नसकेकामा माफीसमेत मागेका छन् ।
प्रतिक्रिया 4